一個人做六份工 林鄭：也有軟弱時

政改諮詢年底開波，由政務司司長林鄭月娥領軍「政改諮詢專責小組」，有心水清人士同林鄭屈指一數，佢現時身兼扶貧、人口、西九、滅罪及推動回收業可持續發展五個督導委員會主席，再搞埋政改諮詢，由垃圾到政制六大範疇都關佢事，成為特首以外，梁班子最忙碌的高官。

「政改三人組」由林鄭月娥（左）領軍，拍住袁國強（右）、譚志源（中），三人率先打頭陣。

有政界人士分析，政改由林鄭打頭陣有好處，有同林鄭有合作的泛民大佬級人馬認為，林鄭始終係公務員出身，係跟足規矩辦事，唔會亂咁出牌，加上林鄭現時又確係CY班子內民望最高嗰個，官場亦有一定威望，到時佢落場傾，泛民班友點都會「畀面」，相反如果由CY出馬，可能未傾入肉已反晒枱撐到行。

林鄭其實好樂意多啲來密啲手，據熟識林鄭的官場中人話，如果有重大政策出台無佢份，林鄭反而唔自在。不過幾打得都好，始終都係人。事實上，林鄭最近私下都有同政圈好友呻過，由於佢出席好多公開場合需要致辭，但自己太上心，就算下面班AO幫佢起晒草稿，佢都全部自己重頭再寫過，單係寫講辭已耗去佢一部分精力。難怪周日佢出席電台節目時有感而發，話自己都有軟弱時，希望丈夫多些回港，畀個膊頭佢依靠下。