湯盈盈︰我不是怪獸！
湯盈盈和錢嘉樂這一對，算是娛圈大癲大肺的一群！可是，自今年三月誕下女兒錢凱晴（Alyssa）後，兩人即時披上慈母慈父的外殼，由「夜鬼」變回早睡早起的「正常人」；每日不再是忙於出席蒲點與朋歡聚，而是為女兒整理生活時間表，比以前的確有計劃得多。
未雨綢繆，不等如諸多要求！女兒兩個多月大時，湯盈盈被拍得偕錢嘉樂到名牌幼稚園報名，因而被指是「怪獸家長」，湯盈盈趁機澄清：「我唔覺得自己去到『怪獸』呢個地步，只不過認為報咗名先冇壞，間學校又近，我又坐完月，咪去遞form囉！我唔會逼個女第時要點樣，最緊要佢健康就得喇！」
湯盈盈最近獲邀擔任纖體代言人，短短兩個多月便纖走三十磅，並坦言希望盡快生多個，給女兒做伴。
計劃周詳
去年十一月，湯盈盈挺着五個月大肚，與拍拖四年的錢嘉樂在洲際酒店舉行婚禮。今年三月，兩人的愛情結晶品錢凱晴出生，把夫婦兩人的關係更緊扣，也改變了他們的生活習慣，湯盈盈笑言：「我同嘉樂不嬲都係『夜鬼』嚟嘅，就算我佗住BB，都一樣半夜，甚至天光先瞓。不過，囡囡出咗世之後，我做咗纖體代言人，佢哋教我要減肥就要早睡早起，我依家每晚十點零就準備上牀瞓，朝早六點起身，我覺得我依家變番個正常人喇！」
改變，不只在生活習慣上，還有個性上。以往的湯盈盈，「今日唔知聽日事」，如今則凡事有計劃，並會為愛女整理每日的時間表，她娓娓道來：「譬如：個女幾點鐘食奶、幾點鐘瞓晏覺、幾點鐘沖涼，樣樣嘢都要有安排，咁將來佢讀playgroup，我又要再調校過啲時間；依家諗嘢係會諗遠咗。」
「諗遠咗」，當然包括女兒的教育路向。凱晴兩個多月時，湯盈盈便被拍得偕丈夫錢嘉樂到名牌幼稚園報名，因而被冠以「怪獸家長」，湯盈盈澄清說：「因為有啲學校真係要早啲報名嘛，而且我啱啱坐完月，間學校又咁近，喺電腦print out表格出嚟填好攞去遞之嘛，報咗名先冇壞o架。我唔會覺得自己去到『怪獸』嘅地步，我又唔會逼個女第時要點樣，最緊要佢健康就得喇！」
今年三月十日，湯盈盈為錢嘉樂順產誕下七磅三安士的女兒錢凱晴，展開三人行的幸福生活。
