呂珊:媽咪係石堅!
呂珊,四歲當童星、七歲做歌手、十歲獲頒「十大電視藝人」,同期得獎紅人包括:何琍琍、狄龍、陳美齡和李小龍等,現為環星唱片公司的一姐。
縱橫娛圈逾四十年,呂珊歌視兩忙、樂此不疲,不為賺個盤滿缽滿,只求充實人生,沉醉於多姿多采的生活。多得呂珊媽媽Helen姐,成就了其豐盛人生,「媽咪係石堅,自細對我好嚴格,雖然我唔鍾意讀書,但操行一向都攞A!全靠佢支持我唱歌,令我今時今日都仍然可以繼續做我鍾意做嘅事,到七十歲如果有人請我唱歌,我依然會唱!」呂珊斬釘截鐵的說。
縱橫娛圈逾四十年的呂珊,首次帶着母親Helen姐接受訪問,大談母女溫馨往事,甜在心頭。
呂珊五歲開始晚晚失眠,母親Helen姐為了她的健康,遵從醫生的建議,讓她做自己喜歡做的事,展開了呂珊七歲當歌手的星途。
唱歌治失眠
不似梅艷芳和馮寶寶,呂珊四歲當童星非為賺錢養家,只是柴娃娃接拍世叔伯呂奇主演的電影《梅蘭菊竹》;正如呂珊媽媽Helen姐所說:「佢(呂珊)細細個出嚟唱歌,唔係屋企需要佢搵錢,只係佢鍾意唱!」不忘補充一句:「我唔係咁支持o架!」
呂珊父親呂永是報章的總編輯,還為粵曲編曲,以及為電影寫劇本;母親Helen姐中學畢業,英文說寫流利,總算出身文化界,偏偏呂珊卻不喜歡讀書,能動不能靜,天生要食娛圈飯。Helen姐娓娓道來:「畀佢去唱歌,因為我想佢身體健康、想佢瞓到覺、想佢過正常生活!因為佢由五歲開始就晚晚失眠,睇勻中西醫都話佢冇病,醫生話畀佢去做佢鍾意做嘅事,消耗啲體力;初頭我哋係畀佢去學跳舞先,但係佢都仲係失眠。記得有一晚我仲喊住叫佢瞓覺,再問佢鍾意做啲乜,佢話佢真係想唱歌,佢爸爸就帶咗佢去跟許佩老師學唱歌。」