八十年代，雪梨挾着「米雪胞妹」之名加入娛圈，轉瞬便與有婦之夫徐少強擦出愛火，珠胎暗結。因為愛，雪梨摒棄世俗的眼光、家人的反對，堅持當上未婚媽媽，甚至退出幕前，專心湊仔。

女人絕對戀愛大過天，雪梨為徐少強誕下餅印子徐偉棟三年後，再誕下幼女徐頴堃，跟着卻盛傳因男方風流成性，雪梨傷過痛過心淡了，毅然帶着一對子女離開，獨力撫養。回想從前，她無悔無恨，理直氣壯的說：「都分開咗咁耐囉，我覺得唔好畀自己一個煩惱、憎恨心，去綁住自己，唔啱咪分開囉。我自己有手有腳，我自己做嘢，都養到對仔女咁大喇，又養得起自己，我今生無悔！」

雪梨為徐少強所生的一對子女現已長大成人，長子徐偉棟是曾志偉「影市堂」旗下藝人，幼女徐頴堃則擔任有線電視《為食情報局》的主持。

選擇

十七歲的雪梨與徐少強，因合作拍攝電影《養鬼》認識，轉瞬墮入愛河，女方更為有婦之夫懷孕，飽受世俗人的閒言閒語、家人的反對聲音，雪梨一句：「係我揀嘅！」封了其他人的口，其母惟有淡然說：「咁你自己小心啲啦，有咩事就打畀我，我嚟照顧你。」

「我嗰時只係十七歲，好細o架咋，所以個仔由婆婆湊到一歲大先由我湊番，佢又細，我又細，兩個鬥細，都要媽咪教我餵奶，咁我咪學湊仔、煮飯，做黃面婆囉。我媽咪由細到大都好錫我，我都好錫佢，所以我要盡心盡力為對仔女，好似媽咪為我咁樣。」雪梨說來輕描淡寫。

幼女還是嬰兒時，雪梨便跟徐少強分開，因為有恨，其後有四至五年時間不讓男方跟子女見面，這張一家四口全家福，實屬難得。