![](http://eastweek.my-magazine.me/tmp_images/article_images/27850/nm_538380.jpg)
香姑翻舊帳 疑波哥出陰招
前立法會會計界議員譚香文,見到死對頭波哥受千夫所指,亦翻舊帳力數佢當年點樣打壓對手。
香姑同本刊講,○四年兩人對壘,經一輪混戰,波哥以三十七票僅敗,極唔順氣。一年後波哥榮任會計師公會會長,以往公會都幫會計界立法會議員寄工作報告畀會員,但○六年打後,佢就宣布取消呢個做法。香姑質疑因為自己否決政改,所以被對方政治封殺,但波哥當時極力否認。
到咗○八年,香姑在投票前兩日舉辦免費業界計分講座,被指選舉舞弊,惹上官非,最終連任失敗,後來發現頂證佢嘅,係當年支持波哥嘅林智遠。事後波哥聲稱「唔關佢事」,不過香姑話手上有一份廉記嘅口供,清楚顯示當時有一位叫周嘉亮嘅波哥助選人員供稱,係佢叫林智遠搵人去錄音,所以香姑一口咬定,件事同波哥有關!
![](http://eastweek.my-magazine.me/tmp_images/article_multimedia/27850/1_n.jpg)