兩常秘怕怕 唔肯「接波」
如果要搵人替波哥，佢下面兩個常任秘書長，都有能力頂上，而且唔會招風招雨，做嘢可以更順利。
呢個想法亦好合理，但最大問題係，佢哋肯「接波」嘅機會微乎其微。
官場中人指，如波哥落台，常秘韋志成係做局長首選，另一常秘周達明亦可以，但佢哋都係資深AO，仲未到退休之年，如果出任問責官員，就要離開公務員行列，除非好有政治抱負，否則極唔划算，估計佢哋都唔會願意。
而且發展局局長個位點難坐，佢哋最清楚，而家守喺二線唔使食正風口，冇咁容易周身傷，叫佢哋頂上，啋你都傻啦！加埋麥齊光被拉人封艇，AO聽到做局長都怕怕，要搵佢哋孭飛，難度愈嚟愈高！
