飛哥收律師信 睬你都傻！

飛哥早前在港台《議事論事》爆料話張震遠借地產商錢，呢樣嘢可大可小，佢隨即強烈否認，矢言冇咁嘅事。到上周三，佢更失驚冇神向飛哥發出律師信，要求對方道歉，並在同一節目公開澄清，回覆期限係上周六，來勢甚洶！

本刊記者問飛哥點回應，佢氣定神閒話：「我唔會理封律師信。點解我要收番講過嘅嘢？如果我收番，咪等於驚咗佢？」

飛哥又話，《議事論事》個訪問出街之後，張震遠冇直接搵過佢，亦冇搵中間人同佢傾，一嚟就出律師信。政圈老友指，呢個做法同CY都幾似，幾個月前CY向《信報》發律師信，指練乙錚嘅文章涉誹謗，都係一嚟就嚟，事前冇傾過偈。

另有消息指，飛哥搵過李柱銘問法律意見，決定以靜制動，打到嚟至算，如果真係鬧上公堂，馬丁願意幫飛哥打官司。

睇嚟張震遠咁做都係想阻嚇飛哥，唔想佢老人家再口沒遮攔，亦藉此否認同地產商有錢銀關係，未必真係要去到法庭。