方敏生與林鄭 係同班同學
社聯行政總裁方敏生突然決定提早退休,圈內都感愕然,以佢嘅江湖地位,局長都做到,冇理由咁快收山。
圈中老友講,方敏生同政務司長林鄭相識久遠,當年係港大社工系同班同學,林鄭讀咗一年就轉讀經濟,畢業後做咗AO(政務官),之後扶搖直上,做到CS;而方敏生讀完書就投身社工(第一份工喺李鄭屋邨),直至今日,一直冇做過官。林鄭識英雄重英雄,聽講親自要求方敏生以個人身份繼續留喺人口政策督導委員會,佢亦積極考慮。
老友話,CY當選後組班,亦曾邀請方敏生加入政府做局長,佢亦認真諗過,但其後因為種種原因,並冇成事。可能當時佢已想到一兩年後離開公職,以個人身份推動社福,唔使受職位束縛,所以冇答應入官場。
方敏生其實同政界好有淵源,老爸方心讓醫生做過行政立法兩局議員,堂姐陳方安生回歸前後都任CS,但佢就冇乜官癮。
佢退休仲有另一原因,就係另一半亦決定退下火線,所以「You jump I jump」。佢老公張玉堂在美資律師大行Becker and Mckenzie三十一年,做到高級合夥人。張老兄畢業於華仁書院,港大社會系教授呂大樂及吳俊雄都係佢同班同學。