「佔中」外熱內冷　激進派嘴藐藐

「佔領中環」周日發出第一彈，在港大舉行首次商討日，有六百幾人參加，發起人賓利（戴耀廷洋名）、朱牧及陳健民high到爆，會後仲振臂高歌，成個民權領袖馬丁路德金咁款，而在場亦不乏民主派阿哥阿姐（包括余若薇、吳靄儀、卿姐、仁哥等），叫做有啲聲勢。但線人話，呢個運動其實外熱內冷，各路人馬並未力撐，仍然觀望冷處理，激進派更加嘴藐藐，認為班友搞嘢太「書生」，唔會跟住佢哋玩！

戴耀廷等三個發起人周日發「佔中」第一彈，但運動設下種種規限，又太「書生」，學民思潮班中學生表示不滿，拒絕參加，其他激進派則暗裏吹冷風，民主派兩大黨亦只抱觀望態度。

線人指，最近在社運界大紅大紫嘅學民思潮，已決定現階段唔會參加「佔中」活動，因為三個發起人最初話行動只歡迎四十歲以上市民參加，引起年輕網民孖叉連聲，其後又改為十八歲或以上，但學民思潮成員都係中學仔「未夠秤」，唔可以加入，佢哋對此極為不滿，認為所定規矩太「成年人」，參加都冇意思。

黃之鋒對三位叔叔搞「佔中」嘅手法亦睇唔順眼，覺得佢哋太過保守，商討方式未能落到基層，設限亦太多，行動畀種種「框框」箍死。所以班友唔會跟大隊，準備自己玩，將於六月底拋出自己套方案，落區搞街站宣傳，希望引起基層關注。

至於激進派兩大團體——人民力量同社民運，對所謂佔中三部曲亦唔多熱烈。周日嘅商討日，人民力量幾個立法會議員包括大嚿同慢必，都冇現身，而主席劉嘉鴻及其他執委亦冇嚟，只有蕭若元條o靚林雨陽到場。長毛雖然有登記，但場內就唔見影，睇嚟只係應酬吓，唔會積極投入。

毓民一早表明唔撐「佔中」，認為行動只係幫民主派洗底。

社民連副主席吳文遠後來在facebook留言，覺得商討日不過不失，但對三位發起人臨尾高唱〈We Shall Overcome〉，就好唔欣賞，話下次唔好再唱歌啦，言下之意係做騷做得太兀突。

激進派「教父」毓民一早就擺明車馬反對「佔領中環」，認為班友搞呢壇嘢只係幫民主黨洗底，令市民忘記當日就政改同阿爺妥協。所以佢條o靚黃洋達一直在網上唱衰「佔中」，講到一錢不值。

線人又指，民主派兩大黨一眾阿哥阿姐，雖然都出席商討日，但內部討論時都認為不宜以黨名義發動群眾「佔中」，參加都只以個人身份，唔想個黨被三個發起人牽住鼻子走。

照咁睇，「佔中」表面熱烘烘，背後其實仍然一盤散沙，激進派擺明有自己一套玩法，唔會跟發起人所訂規矩，日後如果真係「佔中」，佢哋就舉支旗操入嚟，所謂「愛與和平」，邊個會跟吖？屆時各展神通，必定亂過亂世佳人！