四叔捐地「奇想」 背後有段古
四叔向政府提出捐地起平樓,列出名單有七幅,首幅位於元朗,可達一千個單位,畀後生仔置業。呢個構想原來背後有段古。
知情人士講,兩年前春節(一一年),某地產財團友好去四叔屋企拜年,佢首次提出不如幾個地產商一齊捐出地皮,起樓以平價售出,希望年輕一輩可以上車。但呢位友好當時表示唔同意,原因係建議交畀政府,要落實都好麻煩,甚難成事,反而引起議論多多。
但四叔仍然覺得呢個構想好值得做,於是着手研究,並在大半年前單拖向政府提出建議,但政府諗嚟諗去,擔心被外界指益地產商,所以至今仍然只係「研究、研究」,有排都未扑槌。