田少明攻遠哥 暗玩經民聯
田少上周提出動用「特權法」查商交所事件，借呢把尚方寶劍插向張震遠，如果畀佢過到，不單止遠哥要「受審」，CY同煲呔可能都要被盤，幸好經民聯箍實幾票，張華峰同石禮謙冇倒戈，遠哥至甩難。
線人話，今次行動係由田少一手策劃，佢嘅盤算係，動議如果過到，就可以玩晒全世界，佢同自由黨形象將大大突出，對日後直選有利，所以佢曾經搵過張華峰同石禮謙游說，想拉兩人幫拖，希望可一舉功成；就算動議過唔到，亦可逼到經民聯現形，令人覺得佢哋口講證監會監管不力，但一講到「開庭」審問就縮沙，民意分大失。
上周五內務會議開會前，田少逐個議員打電話拉票，但經民聯大佬最後階段傾掂肥張及阿石，唔支持動議，政府方面陳家強亦落力說服議員，加上原來表示支持嘅謝偉俊冇出席，動議終被否決。
坊間傳言係李嘉誠叫田少出手，田少對此即時否認，接近長實人士亦澄清絕冇其事。
