最美麗法官 父母皆猛

法官形象都係古板嚴肅，個樣一見就驚幾分，但上周判警司黃冠豪罪成嘅裁判官謝沈智慧個相一出街，坊間都「嘩」一聲，大讚明艷照人，好有明星相，加埋佢直斥被告時句句鏗鏘，有專欄作家即封佢為「最美麗法官」。

大家眼前一亮，自然有人再搜尋佢背景，近日facebook就再流傳佢媽咪、粵語片紅星白露明張明星相，同佢嘅法官相並排，大讚兩人成個餅印，一樣咁靚。

翻閱資料，佢父母都十分唔簡單，爹哋沈澄畢業於牛津大學，當年係最紅嘅御用大狀，後來做咗上訴庭法官，再升到終審法院。沈澄父親Henry Ching亦係猛人，曾任《南華日報》總編輯，嗰陣時華人做呢個位極之罕見。

沈澄成為名律師後，於六五年迎娶影壇當紅玉女白露明，婚禮哄動全城，老人家仲記得新人於聖約翰教堂行禮，有幾十個警員參加儀式，再坐林肯牌大房車上山頂道大宅新居。

沈智慧繼承父業，九一年獲大律師資格，當年係大狀界出名靚女，曾傳與李澤楷有一段情誼。到○二年佢加入司法機構任裁判官，判案以嚴厲見稱，有「釘官」稱號，今次黃警司遇到佢，好多人已預知結果會係咁。