老蕭開新網 同長毛埋堆
蕭若元早前拆咗「香港人網」，同毓民反枱，搞散埋人民力量，當時已有消息指，佢好快會另起爐灶，換個招牌重新來過。果然不出所料，老蕭個新網將於六月一日開鑼，改名做「謎米香港」，據講將來會同長毛合作，搭住社民連一齊搞，反而唔同「人力」埋堆。
線人話，老蕭個新網仍然係開放平台，畀社民連等上去玩，兜兜轉轉仍然係激進派嘅喉舌，因為咁樣至發得大。不過老蕭有個盤算，就係「人力」經過一輪內鬥及毓民退出後，剩低嘅都係「蕭派」勢力，佢可以藉呢個平台串連幾個激進派系，大家走埋一齊，互相壯大聲勢，佢就喺台前幕後做大佬。
過往老蕭曾因社民連狠批毓民，與長毛反過面，但政治冇永遠敵人，佢開新網又同長毛靠攏，埋堆齊齊玩，世事百變，睇到你眼花繚亂。
