CY發功「震遠」頭馬

張震遠單嘢勁爆，連日成為頭條新聞，湯顯明多得佢，暫時屈居次位，唔使食正風口。過往呢類風波都會引發「惡搞」創意，今次唔算好多，亦冇咁精警，不過都有得意作品，例如畫CY忽然發「震波功」，將佢隻頭馬「震遠」，近期好少「惡搞」創作畫得CY咁正面。

另外有人將幾個曾經出事嘅「梁營」人馬齊齊惡搞，波哥、林奮強、麥齊光等全不幸免，當然主角係「爆煲遠」。

心水清人士又攞番今年支車公靈籤嚟玩，話籤中所說「莫非不第人還井，亦似經營乏本歸」，批正商交所經營不善停牌。該籤斷曰：「自身頗悲，出入無功。婚姻不合，求財虧本」同震遠哥嘅處境真係好似喎。