波哥低能 唔知張震遠財困

張震遠搞到一身蟻，上周終於辭去行會成員及市建局主席等職，最尷尬係發展局局長陳茂波，因為佢老哥上個月先至破例再委任佢掌市建局，估唔到一個月就落台。波哥跌落地抓番揸沙，話當時唔知道張震遠有財政問題，因為佢各項因素都合適，呢個決定亦係啱嘅。

一位政圈中人覺得呢個答法極居，「波哥係專業會計師，喺財經界都好多年，應有唔少線路，商交所生意愈做愈差，行內好多人都知，負面消息一兩年前已傳出，佢冇理由懵閉閉一無所知。佢咁講，一係講大話，一係真無知，如果係後者，佢用人嘅能力就好值得懷疑。」

呢位人士認為，再委任張震遠應係CY嘅決定，波哥只不過收order做嘢，所以委任前冇再查張震遠近況，簽個名批准就算數。

波哥仲話委任張震遠係得到財爺同意，聽講鬍鬚曾對呢個說法唔多高興，查實波哥今次係自己決定委任，鬍鬚曾冇過問，而一直以來波哥嘅真正老細係CY，只聽其命令行事，好多嘢冇問頂頭上司。

商罪科探員去商品公司搜查罪證，跟住仲會有大鑊嘢爆。

陳茂波再委任張震遠做市建局主席，話唔知佢有財政問題。查實商交所生意唔掂早在行內流傳，波哥冇理由一無所知。