王維基等政府發牌等到起火，接受本刊訪問時揚言如政府到年底仍拖拉，佢就「推牌」搞抗爭（詳見本期「封面故事」），佢老哥今鋪似係嚟真嘅，遲啲必有好戲睇。

一位中大校友同本刊講，王維基八○年做過中大學生會幹事，「內閣」成員包括前特首辦新聞統籌專員何安達，當年Ricky（王之洋名）搞學生行動表現激烈，頗有「長毛」形格，有次學生會爭取改善校內交通，佢帶埋一班學生當街攔截校方車輛以示抗議，十分勇猛；另外在反對中大「四改三」行動中，佢亦打前鋒，同今日嘅校園鬥士比較不遑多讓。

亞視在節目內「惡搞」王維基，並揭發他的「成魔之路」。

佢畢業後成為成功企業家，校園激進行為皆成往事，百分百走入建制，只講生意，不講政治，但今次發牌事件政府反反覆覆，佢已搭晒戲棚，老倌亦埋咗位，逼住要背水一戰，力促政府拍板，文鬥冇用惟有「武鬥」，好可能出大動作。咁嘅形勢下，魔童當年嘅「鬥爭」本能將再上身，政府都幾難對付。

ATV又惡搞 揭「成魔之路」

亞視搞政治爛騷，被外界轟到撻皮，但管理層似乎唔想收手，繼續利用電視節目出招醜化對手，都幾低莊。

早兩日亞視節目《微播天下》整咗段片攻王維基，指佢日日燒錢，如坐針氈，最絕係，將佢「惡搞」為有角有尾嘅魔鬼，預告下期將爆佢「成魔之路」。咁做係咪再次公器私用呢？