波叔組戰鬥隊 研宣傳策略
政府智囊中央政策組最近新聞多多,一哥邵善波身穿「唐裝」上電視話政府唔可以再捱打,而中策組「一定係政府嘅工具」,極有戰鬥格。政圈老友比較佢同前任劉兆佳,話佳叔係學者型,出嚟評論都好超然,只作客觀分析,波叔就擺明車馬係CY戰鬥部隊一員,可見中策組角色已變。
知情人士向小弟證實呢點,指中策組近期研究嘅項目,民生問題已少咗,轉咗去做政治敏感議題,主要係政府宣傳策略,以及傳媒輿論分析等,明顯為政府改變輿情民意度橋,以配合振英哥反守為攻的總路線。
振英哥上周六請中策組一眾成員去粉嶺別墅BBQ,振奮「部隊」戰意。
振英哥亦好重視中策組呢支戰鬥部隊,所以上周末約齊該組全職及非全職顧問,去粉嶺特首別墅BBQ,當晚開足四圍,振英哥每枱坐成半個鐘,並非風花雪月,而係討論佢上任後嘅施政策略,例如壓抑樓價及國民教育等,聽各顧問分析邊啲啱,邊啲錯。
有人幫中策組改名,話CPU(Central Policy Unit)不如乾脆叫做Central Political Unit(中央政治組),咁就名正言順,睇嚟亦相當貼切。
中策組現任顧問中有一批富二代,頗有分餅仔意味,佳叔曾經為此受批評,呢批顧問將於一月一日更換,知情人士話有可能大改組,引入「打得」人馬加入戰鬥部隊,上火線幫振英哥打仗,盡快扭轉捱打局面。