何君堯「起義」鄉事派內暗戰

村屋僭建係CY另一燙手山芋，分分鐘再爆大鑊，政府早前宣布將僭建物申報限期延至年尾，就係想㩒住個火頭。不過鄉事派內就有批人出嚟點火，想撩起個局，裏面涉及兩派暗戰。

屯門鄉委會主席何君堯及屏山鄉鄉委會主席曾樹和等牽頭，搞咗個「爭取新界村屋僭建合法化工作關注組」，近日頻頻有動作，接連開居民大會及發動示威，指申報等如簽「認罪書」，呼籲村民不申報，反建議修訂建築條例，將非嚴重僭建物合法化，更聲言如行動無效，會操去政府總部搞抗爭。

鄉議派何君堯發動村民杯葛僭建物申報，但另一批鄉事大佬擺明唔跟佢玩，並指佢藉機反發叔（小圖）。

近兩次行動都有近千人參加，號召力不俗，令何君堯贏得掌聲，甚至有原居民叫佢做「新界洪秀全」，敢帶領群眾「起義」。但其他鄉頭看在眼中，很不是味道，嘴藐藐。

十八鄉上月開村長大會，多名村長一致同意鼓勵村民登記，「如果唔登記後果會點先？有冇諗清楚先？依家只係曾樹和同何君堯搞搞震，十八鄉態度好清楚！」沙田鄉委會主席莫錦貴同新田文志雙都表明，冇興趣同何君堯埋堆。

有鄉紳爆料，新界廿七個鄉中，除上水侯志強外，未聽聞其他人會加入何君堯陣營，因為大家覺得不能以鄉民利益做賭注，「何君堯身為律師，竟然帶頭叫人唔守法，我覺得真係好荒謬。」何君堯同劉皇發有牙齒印已是公開秘密，有人更質疑佢想藉機作反。

不過何君堯就不以為然，聲言自己只是在建制毫無出路之下盡力一搏，只對事不對人，人哋點講，佢都冇辦法，只希望大家唔好捉錯用神。