苦等廉記結案　林奮強隱匿復工無期

林奮強「奮身」入熱廚房，以為可大展拳腳，圓「黃金五十」之夢，不料個位未坐穩，就燒到周身傷，被迫「休假」落荒逃出火場，至今銷聲匿迹，下落不明。

本刊打聽得知，佢老哥一直隱居香港，終日坐困愁城，出入行蹤小心翼翼，恐防被傳媒狗仔隊跟蹤（事實上他正被長期監視，狗仔一直冇收隊），本來廉記至今未搵過佢飲咖啡，拘捕落案更冇發生，佢大可以銷假復工，重返行政會議做嘢，但佢諗過度過，決定繼續休假落去，暫時唔敢再蒲頭。

林奮強因偷步賣樓疑雲「休假」，至今隱身唔敢蒲頭，希望廉記快快手查清單案，在此之前唔會返行會復工，以免再受傳媒及政客狙擊，都幾慘情！

究竟佢驚乜？知情老友講，廉記開咗file查呢單嘢，早前見過中原負責單deal的經紀了解情況，但之後未見進一步行動，唔知做緊乜，林奮強擔心單案一日未clear，如果佢重返行會，咁啱廉記人員此時上門帶佢返去調查，情況就極之尷尬，亦令振英哥大受壓力。所以佢希望廉記快快手查清楚件事，早日結案證明佢冇違例，到時至可以光光彩彩出番嚟再做行會。

但佢有朋友問過熟行律師，廉記查案有自己一套，冇人可以要求調查加快，過往唔少案件查足一年半載至clear，特別是涉及高官同政治人物的個案，更加精工出細貨，慢慢抽絲剝繭，一寸寸挖搵破綻，時間一定唔會短，如果林奮強要等廉記close file至復工，可以話遙遙無期。

振英哥唔想林奮強銷假，亦唔會叫佢辭職，等場風過咗再算。

其實振英哥都有同樣諗法，唔想林奮強在此階段重返行會，但又覺得佢辭職等於承認身有屎，故最佳做法是維持現狀，以靜制動，繼續匿藏，唔露面唔講嘢，避免引發新火頭，等廉記查成點再算。

林奮強唔敢復工，另一原因係傳媒同激進派仍咬住佢唔放，如果再返行會，等於在戰壕伸個頭出嚟，必然受到幾十支槍狙擊，再掀起一場傳媒公審，到時想唔落台都幾難。

佢亦擔心自己如果再成槍靶，太太又再遭殃，為免家人受罪，呢個時候最好有咁密匿咁密，希望避過風頭火勢，到風平浪靜至慢慢蒲出嚟過番正常生活。老師傅教落，熱新聞一個冚一個，等得三至六個月，任何熱新聞都變冷，到時就可甩難，但最緊要冇新火頭，故上策是「死忍」！

當年如日方中的行會成員范鴻齡（羅范哥哥）因中信事件休假，到最後都冇復職，睇嚟林奮強好大機會步范老兄後塵，無聲無息消失咗。