愛．友共鳴
上期我同《等．我愛你》嘅導演火火（李家榮）、女主角Stephy（鄧麗欣）同男主角Bosco（黃宗澤）傾過電影嘅拍攝點滴。今次直情係大召集，一次過集合火火、Stephy、Sita（陳僖儀）、森美、細So同Otto，去到位於MegaBox嘅「喜百合」，細訴電影幕前嘅愛情，幕後嘅友情！
今晚我同《等．我愛你》一眾演員：森美、Sita、Stephy、導演火火同Otto（左至右）等，喺「喜百合」歎特色淮揚菜。講食，就同電影一樣，易引起共鳴。
純情．主題
《等．我愛你》係火火嘅心血結晶，我欣賞有才華、有heart嘅電影人，所以就擔任電影監製，火火話：「我第一句就同Paco你講，話想拍一部很純嘅戲，純到接近老土，就係嗰啲鍾意你又唔敢講嗰隻。你記唔記得你答我：『乜呢個世界有人係咁o架咩？』
我答：『我哋係時候話畀全世界知，愛情應該係咁樣嘅！』」
哈哈哈！我先代為解說，電影名有兩個意思：第一個係男人會對女人講：「等我嚟愛你！」但男人又往往唔敢講。於是就引伸到第二個意思，即係女人方面嘅觀點，其實女人一生人，就係等男人講「我愛你」。
Stephy話今次對自己嘅演技係一大挑戰，真係要拭目以待。
Stephy今次就係「女方」，而且佢仲係第一次同火火合作：「火火係我好欣賞嘅演員同自己愛嘅導演，一直都有留意佢嘅舞台劇，好創新，係估佢唔到嗰隻，我接到劇本時已好興奮，我好耐無見咁單純又咁吸引到我嘅愛情故事，我好渴望演『朱蒂』呢個角色：一個鄰家女孩，直率又可愛，愛恨分明。」
「有大半部戲都講佢同『秋炳』（Bosco飾）鬥氣，明顯係大家喜歡大家，但又唔敢講出口那種，就好似讀書時嗰種情懷，記得有一場『秋炳』隔街示愛嘅戲，令企喺對面街嘅朱蒂好感動，導演不要求我喊，但我真係感動到喊。火火就係嗰種估佢唔到嘅人，我以為兩個人下一步係kiss，結果令人又驚又喜。」
紹興醉雞好入味，酒香四溢。
金禾鴨掌有一種芥辣味，夠開胃。
成都夫妻肺片，辣得有性格！
醜女．出位
火火筆下嘅朱蒂，為生計投靠表哥，兩老表整天吵鬧，最終擦出愛火，喺預告片中，Stephy藐嘴藐舌插爆Bosco，同過往嘅演出有天壤之別，「今次演繹同過去嘅三部曲好唔同，係大個咗成熟咗啦，人生經歷唔同咗，思想會改變，換轉係以前嘅我，應該演唔到朱蒂呢個角色。雖然都係有點傻氣，但我唔再係以前嘅阿寶（《獨家試愛》角色），演員就是咁吸引，去到唔同階段就可試唔同嘅嘢，而我就可以試唔同角色。」
森美、Sita同Stephy（左至右）分別同火火，其他拍檔擦出火花。
喺火火（右）嘅導演筒下，Stephy（左）尋求突破。
另一位女將Sita，將喺新片中玩突破，飾演一個醜女，化妝之後醜到連鏡都唔敢照添，佢同我講︰「我飾演一個齙牙女仔，佢要箍牙嘅，到依家我都唔敢睇啲劇照囉！」
話雖如此，過往曾有不少女星好似莫文蔚、趙薇飾演醜角而爆紅，Sita再補充話︰「我都希望出嚟嘅效果好啦！雖然拍嗰陣成日畀導演火火同其他演員整蠱，但大家相處得好開心，今次亦係一次好特別嘅經驗！」
寧波乾炸爆腌小黃魚，外脆內香，魚肉滑且甜。
砂鍋淮山豬肚湯，最啱下火。
兄弟．班底
講到特別嘅經驗，火火今次都搵嚟兄弟班幫手：森美、Otto、細So都義不容辭，火火話：「當Bosco嘅角色係咁內斂時，身邊就需要一個好跳脫嘅對手，所以我第一時間就想起森美。」
森美話：「我跟火火合作咗8年，一早有晒默契，又知佢想要乜，亦開始着意點解火火會咁寫個角色同故事，我自己就係由角色性格出發去演戲。
「火火安排個『雙非』嘅女友畀我，即係菲律賓加非洲，仲要唔係靚嗰隻，就知係想增加喜劇效果，了解角色嘅同時，我就不期然諗起阿諾舒華辛力加，佢有錢有面又係州長，居然同自己工人，一個墨西哥女人生仔，點解？呢個係男人嘅power，係要去拯救呢個女人，同我嘅角色好相似。
細So（右）同火火（左）合作無間，有晒默契。
既然有兄弟班底，我梗係要同一眾「兄弟」乾杯啦！
「我要嘅係好80年代嘅setting，所以如果留意到，戲中人所穿嘅戲服、顏色等，都係嗰個年代。」
除咗主角屋企、服裝等懷舊味十足之外，戲中仲有一部貫穿主線嘅雪糕車，係火火等人辛苦張羅，為嘅只係想帶觀眾返回到嗰種仍然愛得含蓄嘅年代。「究竟我係相信純真愛情觀，抑或希望有純真嘅愛情？我喺計劃呢部電影時，仲係喜愛夜蒲嘅，直至拍畢後，就發現自己變咗係追求純真愛情嘅人嘞。」
雍和榨菜炒肉末（跟叉子燒餅），夠心思！
江蘇黃金明蝦球，惹味而不膩。
甜品係湖南蜜餞荸薺餅。
