拉闊愛的教育
「Paco巨星飯堂」一直以拉闊嘉賓層面為目標，所以今晚就特別邀請到保良局蔡繼有學校總校長劉筱玲博士，擔任飯堂嘉賓。
劉校長縱橫教育界40年，對教育有一套心得，佢認為教育必須以品格行先，教育者要用愛令小朋友感受。我就借今晚飯敍嘅地點Sorriso Italian Cuisine以美食取經，了解劉校長拉闊愛嘅教育。
我同劉校長今晚談教育，以水代酒，一樣傾得舒服。
品嘗各國特色
對於教育，劉校長一定係專家；對於食飯，佢亦有一種態度：「我對每個國家嘅菜式都有興趣，好多時都會同埋屋企人去唔同嘅餐廳食晚飯，試每一個國家嘅特色風味。
「因為我喺辦公時間會好忙，大部分時候，早飯都係食一件三文治就算，所以我比較重視晚餐嘅質素。通常我都會揀一啲有view嘅餐廳，除咗可以品嘗餐廳嘅菜式之外，亦可以享受一種開揚嘅感覺。」
劉校長平日教務繁忙，對於晚餐亦有一定要求。
哈哈哈！咁今晚我就為劉校長挑選咗一個最適合不過嘅場地啦！我哋一邊享受一個270o嘅維港夜景，一邊歎到有心思有特色嘅意大利菜包，對於平日教務繁忙嘅劉校長嚟講，今次飯堂可謂一舉兩得。
「我好忙，學校依家係中小學，學生有成1,600人、老師都160幾個，加埋其他職員都成200幾人，要照顧一間咁多人嘅學校，真係好忙。
「喺開呢間學校嘅時候，我自己有一個理念，我喺香港咁多年，覺得點解有啲好聰明嘅細蚊仔，讀書會讀得唔好呢？所以我要呢間學校嘅細蚊仔，個個讀書都要讀得開心同讀得叻嘅。」
意大利雞蛋配煙鱔、魚子醬，感覺清新。
頭盤意大利蟹肉配青瓜花，夠晒開胃。
藉飲食而教學
劉校長呢個理念，並非只得空談，佢係行動實踐派，佢為咗令「蔡繼有」嘅同學建立生意概念，亦花過一番心思，「我好鼓勵細蚊仔去學烹飪，因為對佢哋嘅發展有幫助，佢哋學識整曲奇餅、蛋糕等等嘅食物，我就喺學校特設一間小店，畀佢哋去學習經營。
「呢間小店係畀細蚊仔銷售佢哋親手整嘅食物嘅平台，可以畀佢哋預先有business嘅概念，透過小店去學習營運。」
面對以特別方法烹調嘅Seabass（鱸魚），我同劉校長都忍唔住先「餵」iPhone，拍低特色美點。
哈哈哈！劉校長嘅活動教學法，藉學生「經營」小店去學習生意營運，比單一化閱讀教科書更加有效益，同「讀萬卷書不如行萬里路」有異曲同工之妙。
至於學生學習語言、文學，劉校長亦有自家一套，「譬如我學英文，我會鍾意咗呢個語言先，先會學得好。所以，依家蔡繼有每班都有一個外籍老師，又有一個中文嘅班主任，咁學生學得好close，等佢哋習慣咗又講中文又講英文，每種語言都係一句一句講，唔要夾雜嘅，學語言係咁學嘅。」
意式鱸魚海鮮湯，賣相已經夠特別，配上藍青口，更加突出海鮮味道。
紅蝦扁意大利粉，刺激味蕾。
寓閱讀於親子
活動式教學劉校長其中一項實踐教育，另外一項，就需家長配合，「我成日都勸啲家長，一定要同啲細蚊仔傾多啲偈，如果傾到偈，你嘅細蚊仔就一定冇問題。我間學校一直都有開家長晚會，同啲家長溝通吓，有時分享吓一啲親子心得。」
親子方法五花八門，劉校長就用閱讀，令家長同學生嘅距離拉得更近。「家長可以日日同細蚊仔讀吓書講吓古仔，已經夠o架嘞，其實有閱讀嘅習慣係好緊要o架，所以我呢間學校係冇課本，用圖書嚟教，咁細蚊仔咪好鍾意睇書囉。最重要係教佢睇書嘅方法、技巧，將圖書內容同聽說讀寫、表達接軌，佢會學得開心好多。」
劉校長縱橫教育界40年，佢對一個信念，堅定不移，「我信每個細蚊仔都得，同埋畀佢各方面都有發展，從興趣作為起步點去教佢，功課盡量做到好趣味性、思考性，從自然出發。」
劉校長主張「以品行先行」教育，致力培養學生嘅良好習慣。
今晚得到大廚Ken（右）嘅精心安排，我同劉校長都對餐廳菜式相當滿意。
甜品拼盤為今晚飯敍劃上完美句號。
燴和牛牛面肉，肉腍而滑。
Sorriso Italian Cuisine
