基哥求合併 民主黨唔騷
馮檢基險贏超級議席,避過民協「滅黨」之災,但九龍西老巢終於不保,地膽譚國橋落敗,經營二十六年嘅地頭崩盤,民協前景岌岌可危。線人回報,民協核心成員知道咁落去,遲早玩完,故重新提出同民主黨合併,而一向堅拒合併嘅「創黨大佬」基哥,態度亦軟化。
基哥同友好講,今次選舉結果,顯示激進派抬頭,政治形勢已變咗,民協單打獨鬥愈嚟愈難,唔可以唔考慮同民主黨合併。
以前民協副主席廖成利多次提出兩黨合一,但基哥唔想放棄民協個山頭,一直反對。如今形勢比人強,基哥終於改變初衷,不過又輪到民主黨有保留,線人話兩黨嘅地區樁腳,在九西早有積怨,雙方抗拒合作,民主黨於九西保到一席,阿涂又贏咗超級議席,已冇需要合併打救民協。