ATV焦點幕後寫手 係管理層新貴

早排國教風波搞到滿城風雨，當時亞視嘅《ATV焦點》播出一篇爆火評論，指學生搞手係反對派棋子，即刻引起網民圍攻，小弟從接近亞視老友得知箇中內情，問題都幾複雜。

據老友講，月前親中報章《大公報》前執總雷競斌去亞視返工，職銜係副總裁，但一到埗即介入新聞部工作，仲坐咗前新聞總監梁家榮個辦公室，佢角色係乜，不說自明。佢更同新聞部同事講，自己係由電視台最高層某人聘請，以示權威。

以前《ATV焦點》只係做新聞分析，講吓時事背景，冇觀點立場，但雷老兄就位冇耐，就將《ATV焦點》改為社論式節目，每日發炮，而且由佢親自操刀，用詞尖銳，「左」味濃郁。

聽講雷老兄除咗介入新聞部編採事務，仲獲委另一重任，就係睇埋公關部，扮演類似中宣部部長角色。

《ATV焦點》惹來網民及泛民圍攻，又因幕後寫手乃管理層成員，可能違反電視守則，分分鐘有手尾跟。

如果ATV係報紙唔係電視台，就乜問題都冇，報社可以有自己社論，幾「左」都得，問題係電視台有套法定守則，其中一條係要客觀、不偏不倚，所以香港電視台從來都冇「社論」，搵嘉賓上去評論就得，不過都要好平衡。

今次《ATV焦點》發表觀點鮮明評論，雖然加咗個筆名，但播放方式令觀眾覺得係電視台立場，加埋寫手屬管理層，就明顯踩界，有違反電視守則之嫌。

今次事件，廣管局收到幾萬個投訴，一定會展開調查，若然有啲做法同電視守則牴觸，問題就更加嚴重，分分鐘有手尾跟。