建制大佬開密會 搶兩大陣地

泥漿大混戰落幕，建制派搏到盡攞到四十三席，算係守住個勢，但對手一批入局新丁，個個狼過狼英，未來議會戰場必定沙塵滾滾，場仗極唔易打。建制派班大佬亦知戰情險惡，上周六開咗一次密會，討論如何爭奪內務委員會同財務委員會嘅主席位，防止兩大陣地淪陷。

據知當日在場包括譚耀宗、葉國謙、林健鋒、馬逢國、田北俊、方剛、陳健波等，代表建制派內幾大派系，一眾大佬都認為，要同泛民爭內會及財委會主席位，首先要自己傾掂人選，唔好鬼打鬼，初步共識由「經濟動力」嘅梁君彥Chair內會。雖然事前傳過田少有意攞呢個位，但會上佢冇表態，可能自知欠支持，無謂爭。

葉劉將力爭做保安事務委員會主席，亦好有機會入行會。

至於財委會，有人提議金融界嘅吳亮星，因佢以前亦做過財委會副主席，熟悉政府財政，並非新丁，做呢個位好適合。但田少認為吳亮星冇做立法會幾年，生疏咗，張宇人做好啲，顯然想捧自由黨人馬出掌財委會。

田少講完一輪，席上冇乜附和，反而有人講，邊個做財委會主席都好，一定要有full commitment，暗示張宇人未必夠投入喎！會後有出席人士閒聊，張宇人逢周三晚都去睇跑馬，肯唔肯開長會，好成疑問。雖然大夥未有共識，但多數人都傾向吳亮星。

至於保安委員會主席由邊個做，早前葉劉表示過有興趣，佢以前係保安局長，極熟政策，由佢同涂謹申爭呢個位，比其他人更勝一籌。不過建制派內亦有人提議葉國謙。

上屆財委會由民主黨卿姐揸弗，保安事務委員會主席就係涂謹申，如果建制派今次成功搶走呢兩個位，對泛民都幾不利！