插林健鋒想入行會　田少上演王子復仇記

今次選戰，泛民內「我想你死，你想我亡」露晒出嚟，公民黨想搶到盡，結果累死高達，以後兩黨好難再真誠合作。建制派表面上較團結，其實舊怨新仇，亦難一笑而消，好似田少咁，當選冇耐，就明插林健鋒，擺明有你冇我，呢套「王子復仇記」，以後仲有連場好戲上演。

田少今次直選得米，加埋其他功能組別，自由黨議席增至五席，難怪佢鬆毛鬆翼，意氣風發，因為太high，太子爺脾氣又發作，竟然急不及待公開勁插「叛將」林健鋒，指經濟動力係「保皇中的超級保皇」，大家以後好難再走番埋一齊。佢仲話林健鋒打條橙色呔出席振英哥飯局，擺明已變咗梁營。句句說話都有骨，十分辛辣！

田少直選勝出，意氣風發，擺明想做議會內工商界盟主，加上當年「4L」（下圖）拉隊退黨嘅新仇舊恨未消，近日公開明插林健鋒，火藥味甚濃。

大家未必記得兩人恩怨。話說當年田少在自由黨建立「田氏皇朝」，儼如一國之君，核心成員如林健鋒、梁劉柔芬、梁君彥等都頂佢唔順，四年前田少選舉落敗，成個黨散晒，佢哋亦拉隊走人，另起爐灶搞咗今日嘅經濟動力，同自由黨爭奪工商專業界領導權。田少對呢次大分裂耿耿於懷，怨憤難消，故今朝一得勢，即刻對宿敵踩到盡。

線人回報，田少咁做背後仲有個算盤。自由黨現在有五席在手，經濟動力只有三席，田少認為係時候帶頭重整工商界勢力，由自由黨揸大旗，政府想游說商界，就要搵佢，因為佢至係真正大佬。

佢想做盟主，唔止心咁諗，仲講到出口。佢早前同傳媒話，「我係總商會理事，各大財團都喺裏面，我可以最快掌握最新經濟情況，政府應搵我哋聽意見。」

田少雄心勃勃，仲有一個更大目標。雖然佢公開話唔會入行政會議，如CY搵佢，佢會say no，但線人指，田少只係把口咁講，其實一直有心結想重返行會，進入決策核心，攞到更大影響力；此外，田少極唔想對頭人林健鋒入行會，如有機會㩒低對方，自己坐上去，佢必會咁做。

田少雖然話要團結工商界，但又表示唔同經濟動力埋堆，即係話，以後同林健鋒各自修行，絕唔會一齊玩，講到明搞分裂。講到尾，佢都係要唯我獨尊，做大哥大，個個跟住佢走。

咁落去，工商界想建立政治聯盟力撼泛民，又係得個講字，阿爺成日想班友走埋一齊，但佢哋恩怨咁深，野心咁大，睇怕好難成事。