霸氣盡現
近期港產片屢見佳作，《低俗喜劇》緊貼港人視野，即將又有網絡熱爆嘅小說《一路向西》躍現大銀幕，呢部充滿話題性嘅爆笑性喜劇，未上映已展現霸氣，我又點可以唔邀請《向西》台前幕後嘅精英擔任「Paco巨星飯堂」嘅嘉賓呢？
今晚我同掌舵人蕭定一、導演胡耀輝、男主角張建聲、王宗堯、郭穎兒（Celia），以及何佩瑜（Jeana），齊齊去到位於尖沙咀嘅「雲來軒」，以高檔Fusion粵菜，率先為呢部霸氣話題作慶功！
今晚我同王宗堯、導演胡耀輝、Celia、阿一、張建聲同Jeana（左至右）率先為《一路向西》慶功！
忠於原著
蕭定一去年一部《3D肉蒲團》，經已創下4千萬票房佳績，今年再嚟一部《一路向西》，仲比我早一步買下同名原著小說嘅版權，不論觸覺同魄力都可見一斑。而且今次阿一繼續秉承100%香港製造、全新人班底嘅原則，仲話：「我哋要諗好晒包裝好先去做，《向西》將會係港版《American Pie》（美國處男）！」
電影未上映，但已經瞬即成為熱話，而且周末嘅3D優先場仲一早爆滿，有內地觀眾計劃組團嚟香港「朝聖」，事實再一次證明阿一眼光獨到之處。「其實我一直想拍一部華人版嘅《American Pie》，玩情色嘅性喜劇，少少鹹多多趣。笑一直係性喜劇最重要嘅元素，可惜一路都諗唔到個包裝，直至有一次聽到人網介紹《一路向西》呢本書，我用咗一個下晝嚟睇本原著，覺得有得做。
導演（左二）同阿一（右二）齊為電影解畫。
「經濟上，最起碼時裝片唔使好似《肉蒲團》咁貴，又容易處理，改編一部暢銷小說好着數，因為原著一早有受眾群，唔需要花太多錢喺宣傳上面，所以我同導演都覺得博得過，於是就主動聯絡作者，傾合作買版權。」
《向西》導演係編劇出身嘅胡耀輝，佢熟悉電影製作嘅每一個細節位，首次擔大旗執導演筒，胡耀輝一手包辦編寫劇本、選角同拍攝，「改編最難嘅地方係向西嘅小說入面，只有兩段較長嘅古仔，根本冇可能寫得成一部電影嘅劇本，我又唔夠膽亂改向西嘅作品，不過好在原著入面有好多散文啱用。
「如果有睇開向西，你就會feel到有啲片段同gag位係熟口熟面嘅，而且向西都有睇劇本同畀意見，如果佢嫌有啲對白out咗，我哋都會重新度過，所以電影版9成係忠於原著。」
心心相印蒸大蝦球（$138）用元朗自製豆腐，選用幾両重嘅大虎蝦球，秘製上湯玻璃芡，賣相十分吸引。
懷舊濟公焗蟹缽（$298）係昔日六、七十年代風行全港大牌檔嘅菜式，選用特大肉蟹配以雞蛋焗，缽裏有16年陳皮絲、新鮮鹹蛋黃粒、油炸鬼片等，味道香口懷舊。
檳城棒棒骨四方盒（$168）選用自製方包烤焗至金黃，外脆肉軟，配合自製新加坡椰汁咖喱，豬仔髀骨，肉質柔軟。
素人上位
解決改編高登風行嘅原著之後，導演就着手另一個令人頭痛嘅環節，「選角方面真係好難，我哋喺香港、台灣、中國都搵唔到人，大部分都扭扭擰擰，話你係李安咪拍囉，對手係梁朝偉就最好，吳彥祖就仲正，我直頭呆咗，後嚟第一個選中嘅係Celia（郭穎兒），嗰陣時我連男主角係邊個都唔知，佢都一口答應，真係好爽！」
得到導演欣賞，Celia話：「我自己本身都好鍾意《一路向西》呢本書，所以當我知道有份演出嘅時候，已經好興奮，我份人好直接嘅，唔鍾意拖拖拉拉，梗係一口應承啦。」
之後導演再補充：「Celia嘅角色一直未定實，見咗佢幾次之後，我覺得佢好直接又幾爽朗，講嘢好快冇尾音，又會整到自己好靚咁，具備港女嘅條件，放喺向西身邊做女朋友就最適合不過。呢個角色好重要，係用嚟對比內地嘅女仔，連阿一都話佢講嘢倔，冇尾音，成日都好似好晦氣咁。」
張建聲（左）同Jeana首次合作，擦出火花。
Celia（右）以素人身份參與電影拍攝。
大漠風沙鮮蟲草牛肉卷（$108）選用一級鮮蟲草花配以嫩滑肥牛片，此菜設計新穎，係少有嘅中菜食療菜式。
水芙蓉蒸明蝦球（$138）由大廚秘製滑似豆腐花之蛋白底，用上蝦味十足、肉爽嘅大虎蝦球，最面淋上上湯甘筍芡，適合一家大細食用。
皇牌燒鵝（$478一隻/$268半隻）以特選廣東省陽光市「冠頂鵝」，肥瘦適中，肉質帶柔勁，鵝味十足。
演技挑戰
除咗Celia之外，Jeana喺戲中都有作出自我挑戰，「我喺《向西》入面係飾演一個祖國佳麗，講嘢有濃烈嘅鄉音，所以當我一知道要飾演一個咁嘅角色嘅時候，我就睇咗一啲描述類似人物嘅電影，當係參考，其中我有睇埋爾冬陞嘅《旺角黑夜》，要參考就要搵一啲最有水準嘅教材吖嘛。」
哈哈哈！Jeana為今次演出非常認真，令阿一同導演都讚不絕口。另外，導演仲力讚同男主角張建聲大戰嘅23歲醫科學生王李丹妮，「王李丹妮真係好勁，其實小魚呢個角色，直至開拍前一個禮拜都仲係懸空，到一晚半夜，我收到張無頭得個胸的裸照，我第一時間就搵人影輯全裸照嚟睇吓。
李丞責博士（後排右）有緣路過，我請佢同一眾嘉賓及「雲來軒」老闆、大廚Paul合照留念。
「第二朝王李丹妮單人匹馬上酒店房影相，真係好有膽識，我亦馬上搵人同佢傾。佢好有天份，頭十分鐘嘅水牀大戰真係好精采，好多女性觀眾未必知道，水牀上浮吓浮吓咁，仲要整泡泡，真係一下唔覺意都會飛出牀架。拍攝嗰時，王李丹妮同張建聲都拍到病，我一嗌Cut，佢哋兩個就爬埋一邊攬住瞓，仲要閉門連續拍60個鐘，真係一個大挑戰嚟o架。」
兩位女演員喺電影中都作出突破演出，我同佢哋乾一杯！乾！
蒜泥白肉（$68，左）選用肥瘦適中黑毛豬，將嫩肉切成薄片，用沙津菜捲起，口感富有層次外，絕不肥膩。而胡麻鮮淮山（$68，右）則用上鮮淮山，具有去濕功效，當前菜堪稱一絕。
生煎金沙龍皇帶子（$198）選用一級精選日本北海道帆立貝將帶子及大虎蝦製成蝦膠一層層叠上，巧妙將帶子煎至半熟使其口感柔軟。
川貝冰糖陳皮燉原個雪梨（$48）選配高級寧夏杞子，天津鴨梨，加上遠年陳皮、冰糖、川貝燉足三個小時，止咳化痰潤肺。
雲來軒
