立會新聲勢
「Paco巨星飯堂」涉獵嘅嘉賓層面廣闊,又點止畀你哋睇巨星咁簡單?今晚我就邀請到九月初喺立法會選舉中勝出嘅「人民力量」慢必(陳志全),同佢嘅選舉拍檔袁彌明(Erica),去到位於紅磡嘅意大利餐廳「Messina」,品嘗特色意式料理。
佳餚以外,啱啱成為香港首名出櫃立法會議員嘅慢必,表示會喺立會為同志發聲,亦會同Erica分別喺議會內外抗爭。呢股立會新聲音,不容小覷。
我同慢必(左)、Erica(右)喺「Messina」歎住意大利菜講理念,夠晒hip!
為人民發聲
勝出立法會選舉後,慢必同Erica不約而同表示,為港人發聲嘅道路,仍然漫長,Erica話:「香港仍然有好多唔公義嘅事,『人民力量』就係要為人民爭取權益,我哋仍然要長期抗爭。」
成功入立會嘅慢必,表示入議會嘅先要任務係為同志發聲,「香港有反性別歧視、反殘疾歧視同反家庭崗位歧視嘅條例,但係反性傾向歧視條例就仍然未立法,要保障同志唔會因為性傾向要受到歧視,就一定要立法。當然,我嘅終極目標係推動香港同志婚姻合法化,令同志戀人可以申請公屋、居屋,一齊報稅等等。」
Erica同慢必異口同聲表示為咗香港人而從政,以為人民發聲為己任。
當選後出櫃,並非慢必事前計劃,「我從來都冇否認,我嘅朋友都知,係有次接受訪問時,記者問到,而我亦唔想隱瞞或者講大話。如果畀其他傳媒影到我同伴侶拍拖先公開,反而弄巧反拙啦!」
慢必表示,選舉期間同伴侶分手,現正處於單身狀態,仲同Erica分別透露擇偶條件,「最緊要係政治理念相近,高矮肥瘦都唔係問題。」
Erica就話:「政治理念最好係相近,唔可以持相反態度,唔係成日嗌交就會好煩。一定唔可以呃我,唔使係有錢人o架,咁最重要梗係錫我啦!」
3款開胃小點,佐酒同開胃「一物二用」。
慢必話近日經常食到新鮮無花果,而今晚亦冇例外,今晚每道菜式屬於餐廳精緻菜譜內嘅美點,分$980及$1,880兩款。
狂迷找上門
哈哈哈!兩位嘉賓由演藝界投身政壇,選舉期間都全情投入,而且喺呢兩年期間,慢必同Erica都由地區工作為起步點,以個人同組織魅力贏得唔少義工支持。慢必話:「我哋喺新界東參選,因為資源唔充裕而需要大量義工幫手,有個支持者因為支持『人民力量』,瞞住太太為我哋助選,令到佢太太以為佢有小三。另一個就搞到喺暑假冇時間陪個仔,囝囝就寫信向爸爸表達訴求。」
Erica親自示範狂迷狂態,講到七情上面。
我欣賞Erica從政嘅理想,祝佢成功!
至於Erica,喺選舉之後就仍然受到狂迷滋擾,「因為我之前參選嘅時候,申報嘅地址要刊憲,即係公開咗我嘅屋企地址。有個支持者見到,上個禮拜就拎住紮花去我屋企,同保安員講係我男朋友,跟住就上咗我屋企門口㩒鐘。我喺防盜眼一見到係佢,已經即刻call保安員上嚟捉佢走。
「佢喺門口同保安員糾纏一輪,仲耍晒詠春咁,我嗰時都幾嬲。其實呢個支持者有少少思覺失調,佢一直都有喺我YouTube、facebook留言。呢件事之後,佢話我阻住佢幫手推動茉莉花革命添!」
意式烤乳豬,選用廿日BB豬,再釀入鵝肝、蔬菜燒,配上蘭度豆、洋葱,滋味無窮。
意式海鮮雜燴湯,用料十足。
波叔抄牌記
Erica遇上無妄之災,慢必就為佢喺10月10號開始嘅議員生涯,作最佳準備,「啱啱去咗議會tour,熟悉一下環境。之前仲收到發展局局長陳茂波嘅電話,我喺辦事處覆佢,對話過後,佢同我講:『志全,你可唔可以畀你手提電話號碼我?』」
此話一出,我哋哄堂大笑,事關甚少人稱呼慢必為「志全」,哈哈哈!至於議會團方面,慢必表示,候任立法會秘書長陳維安,為一眾新丁議員講解議員宣誓程序,「我諗佢驚我哋好似上屆長毛咁玩嘢,所以當我哋好似小學生咁教。」
哈哈哈!成為立法會議員係慢必從政、為人民發聲嘅第一步,Erica就仍以此為目標,就祝佢哋可一展所長!乾!