音波功
香港甚少正宗寧波菜館，但香港有才華嘅音樂人就不計其數，其中Joey Tang（鄧建明）同阿Ben（莊冬昕）今晚就成為「Paco巨星飯堂」嘅嘉賓。阿Ben為Hotcha創作、製作過唔少歌曲，最啱請埋Crystal同Winkie，一齊同阿Ben、Joey講飲講食講音樂。今晚我特別挑選咗位於灣仔嘅「文鼎酒家」，一間正宗嘅寧波菜館，畀一眾音樂人，品嘗一下真正嘅寧波功架。
Joey、Winkie、Crystal同阿Ben（左至右）同為推動音樂出力，我將佢地共冶一爐，今晚人材濟濟。
拍住上
我同Joey相識多年，由太極年代到依家，佢依然係快人快語，佢一嚟到飯敍地點，已經話：「Paco，我每次見你，都諗起好多年之前你叫我唱〈一切為何〉，當時我仲唔明白你嘅用意，只係諗：『我係band仔嚟o架嘛，為乜要唱首咁commercial嘅歌？』
「之後，我每次登台、出show，好多人點名要我唱呢首歌，我先至感受到你嘅vision同威力。」
Joey同我相識多年，講嘢自然不避忌。
我同Crystal（中）、阿Ben（右）研究音樂。
哈哈哈！都要有Joey咁嘅實力嘅「Band仔」先發揮到歌曲嘅威力嘅，大家睇之前太極演唱會有幾多人捧場就知啦！好嘅音樂，總要有知音欣賞，好似正在積極轉型中嘅Hotcha，早前就推出咗新碟《0103》，開始走成熟路線。
Crystal話：「今次呢隻碟係Hotcha由3人組合變2人組合嘅第一隻碟，我哋都想做啲同以前唔同嘅嘢，無論喺音樂上定係形象上，我同Winkie都想有啲突破。」
Winkie接住補充：「係呀，好似plug咗嘅〈Hot Lady〉同〈2 Beautiful〉咁，都比我哋之前嘅歌成熟，帶少少女人味啦！哈哈！」
文鼎十八斬（$298）精選野生紅膏白蟹，以低溫氣冷方式處理，肉質既鮮且甜。
桂花糯米棗（$68）用糯米釀入紅棗之中，非常有心思。
富貴花雕雞（$168半隻）選用高山放養嘅土雞炮製，用上陳年花雕，酒味醇而不濃。
新意思
講到〈2 Beautiful〉，我知道係阿Ben嘅作品，佢係其中一位我好欣賞嘅新一代音樂人，就算去年嘅〈食軟雪糕〉畀網民評為年度膠歌，佢都一笑置之，「我嘅音樂係諗住玩吓，惡搞吓樂壇嘅，其實平時做音樂為咗迎合唔同嘅歌手客仔喜好，都要好認真咁做音樂，難得有機會自己出唱片，公司又畀我玩，咁咪放縱玩吓嘢。」
哈哈哈！所以阿Ben喺新EP《KABOOM》入面，玩嘢依然，「我嘅新歌〈怪叔叔跳古怪舞〉，其實係真有其人o架，係一個朋友嘅朋友，佢有自己一套舞蹈，夾起上嚟又好得意，好好玩。
我同Winkie（左）、Crystal（右）講音樂外，佢哋面對特大煎堆「東方之珠」都停唔到手，拍照留念。
雖然阿Ben喺加拿大長大，但佢嘅口味非常中國化，仲盛讚醃菜味道鮮甜。
「有人話我作嘅係洗腦歌，其實做流行曲嘅條件，就係歌詞要令人入腦。幫其他人作曲，我都係好正經同充滿商業元素，但創作屬於自己嘅歌嗰陣，我想作啲好玩嘅歌嚟娛樂自己，而唔係為咗討好人哋。換個角度睇，我嘅歌係娛樂大家，你上YouTube除咗睇到我嘅MV，仲可以睇到高度娛樂性嘅留言，有個留言話，我係港版Justin Bieber，佢可能係想笑我，但我覺得係一個讚賞，因為Justin Bieber嘅歌可以吸引到好多人，呢樣就係音樂人嘅自豪，因為我嘅作品，可以同好多人溝通。」
東方之珠（$158）係文鼎大廚對嶺南煎堆嘅改良版，曾獲得「第三屆中華餐飲美食節金獎」，系出名門。
呢個北菇醃菜就係令阿Ben愛不釋手嘅菜式。
文鼎脆皮燻魚（$98）係江浙菜代表菜式之一，皮脆肉嫩。
舊戰友
我同一眾嘉賓傾吓講吓，忽然有一位好夥伴出現，佢就係許志安嘞！安仔嘅金曲多不勝數，其中包括由Joey創作嘅〈一加一減你〉，首首膾炙人口。安仔今晚嚟，原本係專登送手鏈畀我，「我見條鏈好襯你，咪買嚟送畀你囉。」
哈哈哈！雖然安仔一番心意，但係佢初到餐廳時，竟然話唔方便同我影相，我梗係唔會輕易放過佢啦！當然，以我哋嘅交情，又點會有「唔方便」嘅事？
既然今晚咁齊人，我都要勉勵一眾本地音樂人，只要努力、敢作新嘗試，成功一定唔會離你太遠嘅！乾！
安仔（右）送我一條手鏈（箭嘴示），夠晒有心。
今晚陣容鼎盛，梗係要嚟一幅大合照啦！
秘製香烤大鰣魚（$488）係經過去腥、提香、浸泡、醃製工序後，香烤而成。
霸王獅子頭（$488）係用上等豬肉同清湯烹調，菜如其名、夠晒霸氣。
包公牛小排（$198）係宋朝年間獎賞包公嘅菜式，古法配合現代改良技術而成。
