得票驚人膨脹　毓民長毛再結盟密謀擴軍

選舉大混戰一場，塵埃終於落定，向來挑通眼眉嘅圈中人士拆解結果，話有一個現象特別要留意，就係人民力量參加分區直選嘅五支人馬，得票十八萬幾，加埋社民連嘅七萬幾票，總共攞咗成二十六萬張票。須知道上屆立法會選舉時，社民連仲未分裂，毓民等幾個大佬出嚟選，攞到十五萬票，即係話，短短四年之間，激進派嘅支持票多咗十幾萬，增長十分驚人，唔講得笑。

人民力量與社民連今次除奪取四個議席，更獲得超過二十六萬選票，比上屆猛增十多萬，顯見激進力量迅速膨脹。

再睇幾條「激進佬」嘅表現，亦好得人驚，毓民做咗泛民「票王」唔在講，佢老哥親自挑選培訓嘅政壇新丁慢必（陳志全），只落咗新界東幾個月，得票竟然高過名氣響噹噹、盤踞區內多年嘅卿姐，喺九席中排第五，咁嘅結果，事前冇人貼得到。

毓民馬房另一匹新馬黃洋達，喺九龍東亦氣勢凌厲，結果得到三萬六千幾票，只輸畀謝偉俊一個馬鼻。毓民班友內部檢討賽事，認為落敗主因係人民力量臨尾被某傳媒及民主黨抹黑，指毓民收共產黨錢，影響咗部分選民，同時馬丁（李柱銘）及某傳媒老闆在投票前開聲力撐社民連陶君行，黃洋達部分票被拉走，最後漁人得利，益咗西環力撐嘅謝偉俊，僅僅多二千票搶走個位。如果黃洋達一個唔該入埋立法會，振英哥就更加頭痕。

黃洋達只落九東做嘢大半年，已差少少就入到局，若非有人抹黑，應可贏出。

其實黃洋達空降唔夠一年，今年三月至喺觀塘開第一個辦事處，冇耐再喺黃大仙開多間，毓民帶住佢周圍拜票，介紹班「架己冷」同「鶴佬」鄉里畀佢識，國教事件又多咗批後生仔票，咁短時間就攞到高票，都算犀利。

人民力量雖然痛失一席，但有三席在手，已算有進帳，加上得票大增，令毓民更加心雄，已部署未來幾年大肆擴軍，double上搶奪更多議席。線人指，佢最近已購置一個物業，籌備開設「普羅政治學院」，成為激進派培養政治搞手嘅「黨校」，暫時只開短期班，教導點搞網台、選舉策略、政策研究等，明年春季就正式開辦一年課程，徒子徒孫將陸續殺入政壇。

毓民仲會同長毛嘅社民連重新結盟，佢哋雙煞合璧，喺立法會有四席，足夠玩到政府陀陀擰。過往毓民同陶君行鬧翻，憤而拉隊另起爐灶，如今阿陶已失勢，兩幫人馬可以再傾聯手，大家有嘢齊齊玩，令激進派系更加強大，咁發展落去，香港政治組合將出現新變化，政府更加難應付。

未來幾年佢哋仲會籌錢在地區開設多個辦事處，學當年毛主席咁，建立「革命根據地」，唔再打游擊，實行擴大地盤，長期作戰，進一步蠶食溫和泛民陣地，睇嚟喺未來日子，民主黨將更難玩。