「梁十招」出台前一周　CY與高官密晤地產商

樓市發高燒，各方睇住「梁大醫師」點落藥，條藥方上周終於出台，大家即時反應係「噓」一聲，覺得冇乜料到。振英哥係咁意做吓嘢，冇用到重磅炸彈，其實背後有套思維（詳見今期「封面故事」拆局），主要唔想隊冧個市。

振英哥咁做，係怕政治後果，而非為大地產商着想，不過唔知巧合抑或有心，佢同幾位有關高官喺「梁十招」公布前一星期，同香港地產建設商會多位代表閉門會面，當中包括幾個地產財團高層，會上曾討論增加住宅供應，及如何壓抑樓市泡沫等，代表提出咗一系列具體意見，振英哥只聽冇乜點講，唔知佢點諗。

振英哥同張炳良、陳茂波、邱騰華等早前同地產建設商會代表見面，聽取對樓市問題意見，在場包括幾個地產財團高層。政務司長林鄭當日去咗機場接奧運選手（下圖），冇出席會見，莫非迴避同地產財團傾偈？

知情人士指，振英哥上台後，未同地產建設商會正式開過會，今次係第一次，所以地產商嗰邊都好重視，出席者唔少係「重量級」，例如長實副主席李澤鉅、會德豐副主席梁志堅等，而政府一邊陣容都唔弱，除咗振英哥，仲有運輸及房屋局局長張炳良、發展局長陳茂波，「大內總管」邱騰華等都在座。

講到增加住宅供應量，代表就單刀直入指出，出現供應不足問題，責任非在地產商，「元兇」係政府嘅官僚程序僵化，如果唔改善，起樓快唔出樣。例如現時發展商收購市區舊樓重建，政府規定要百分百買晒，至可以入則起樓，咁做實情係阻住地球轉，拖慢住宅供應，結果咪托高樓價囉！

亦有代表提出，政府推多啲地皮出嚟賣冇問題，咁做唔會整冧樓價，反而可起穩定作用，最弊係政府用行政手段推低個市，咁就要斟酌。佢哋又講到新界發展，政府可以同發展商合作，增加建屋量，而唔係由政府大片收地。

據知會議氣氛幾好，地產商各宣己見，振英哥雖然冇透露具體措施，但對代表嘅意見都好認真聽，話會考慮。不過部分代表見政務司司長林鄭冇在場，原來去咗機場迎接奧運中國選手，會後就有啲微言，認為佢可能故意避席，唔想同發展商面對面傾偈。

振英哥推「梁十招」有冇考慮地產商意見，外界好難知，但佢今次出手溫和，未見辣招，地產商反應相當正面，地產建設商會執委會主席堅叔就認為，政府出招無可厚非，增加土地供應可令市民安心，加快預售樓花亦係好事，對樓市即時影響唔大，預料新政府唔會用手段打壓樓市。

其實振英哥喺出招前已發出訊息，話唔會推低樓價以符合購買力，等於同地產商講，我唔係你們諗咁狼o架。今次佢哋睇埋「梁十招」乜料，就更加放心，小業主亦唔使驚自己層樓會大貶值。