高人背後協調 民記精密配票

講完毓民長毛，又講吓建制派。今次選舉，民建聯同工聯會對各區每隊人馬分配幾多票，進行精密計算，背後有高人協調，亦有選舉專家參與策劃，根據滾動民調結果，將某名單多出的選票，配畀唔夠票嘅候選人，盡量分到平均，目標係奪取最多議席。

例如新界西譚耀宗發現票多過龍，即通知陳恒鑌同梁志祥嘅支持者，當日唔會投畀阿譚，一定要投畀陳或梁．經過一輪工程，結果三人都得米。

選舉前一日，有親中報紙登出一張各區投票指南，寫明唔同區嘅「自己友」選民，投分區直選及超級議席嘅兩張選票點配搭，如港島東區應李慧琼搭鍾樹根，沙田區就劉江華搭葛珮帆，大家揸住張圖就知道點投票對建制派最有利。呢個指南應該係由幕後高人編整，支持者睇到就知道點做。

在高人協調下，民建聯內部精密配票成功，譚耀宗帶埋兩個候選人，齊齊得勝。

去到投票當日，配票工程仍然每小時進行，線人話當日一直有人睇住各區最新形勢，即刻變陣，聽講到下午時份，估計陳鑑林贏硬，佢部分助選人員即刻換旗換衫，轉去為謝偉俊撐場，極之有機動性。

不過工聯會求勝心切，同民建聯難免有競爭，有時好難協調，例如嫻姐唔肯分票畀劉江華，最後更發爛渣，公開直斥劉拉佢班粉絲嘅票。線人話嫻姐今次係「真動氣」，唔係「耍花槍」，為咗幫工聯會贏出，兄弟都冇面畀。