細味人生六味
人生，要有經歷、磨練先至更見豐富精采，不論面對順境、逆境，只要積極面對種種風雨，曙光就在不遠處。今晚「Paco巨星飯堂」嘅其中一位嘉賓阿燦（廖偉雄），以正能量應付人生各項挑戰，永不言敗，繼續喺內地為事業打拼。最近燦哥特別返港，主持有線節目《名廚．食出五味人生》，同主播黃芳雯（Paula）一齊藉美食帶出人生五味。
不過，據燦哥嘅領會，人生又點止五味咁少？「除咗甜、酸、苦、辣、鹹，喺我呢個年紀，仲領略到人生嘅新鮮感，所以我加多一味──『鮮』。」
哈哈哈！燦哥歷盡人生五味再自成一味，笑看世態，拚勁不減。我今晚就以位於尖沙咀嘅「尚川宮」正宗川菜，用辣得有風味嘅四川菜式，「激」出燦哥心底話！
我同燦哥（右）、Paula（左）喺「尚川宮」一邊品嘗四川菜，一邊細說六味人生。
甜、酸、苦、辣、鹹、鮮
最近燦哥接受香港有線電視邀請，主持介紹飲食嘅節目《五味人生》。燦哥同我講：「由甜、酸、苦、辣、鹹五種味道介紹餸菜，帶出人生嘅道理。」
燦哥由成功演藝人士，轉型經商最終破產，有傳當時欠債高達四、五百萬。不過，佢都繼續努力，歸隱大馬研製叉燒，由一位員工開始，至擁有三間食肆，成立「燦師傅」品牌又結業，到今日要生產出屬於廣東嘅佳釀「米液」，不斷嘅起起跌跌，令佢對人生，更有一番體會。
燦哥（右）經歷豐富，笑對高低潮，值得敬重。
Paula（左）感激燦哥指點，並自言學咗唔少嘢。
「過了咁多年，無論係成敗得失，我嘅人生入面已經冇甜、酸、苦、辣、鹹呢五味，不論係回頭再睇，定係展望將來，我都係得一種『鮮』味。去到呢個年紀（55歲），無論係之前做演員，到做生意，每個階段嘅成功、失敗，甚至依家做有機米業，又讀咗兩個大學學位。對我自己嚟講，最大嘅得着係喺唔同範疇入面，所學到同所遇到嘅事，全部都係我未曾接觸過嘅，每一次我都有新鮮嘅感覺。
「呢一種就係我所講嘅『鮮』，而且每次嘅鮮味都唔同，唔會重複，即係有一種新鮮感。」
梅子露番茄（$38），味道酸味味，為開胃小菜。
涼衣白肉（$59），賣相及味道俱不俗。
重慶麻椒雞（$78）以四川辣椒調出獨特麻辣味。
體現永不放棄
燦哥對人生有自我一套嘅領會，令佢喺《名廚．食出五味人生》嘅拍檔Paula都上咗一課，「同燦哥合作，不論係主持節目，抑或係對人生都有所得着。雖然我嘅人生經驗冇燦哥咁豐富，但係從佢身上，我都學到唔少令自己終身受用嘅道理，好似佢咁積極嘅態度，係好值得學習嘅。」
燦哥從來不向命運低頭，用雙手為人生打拼。
哈哈哈！我一直都覺得燦哥嘅人生路同我嘅好相似，都係經歷過高低起跌，但係我哋都以打不死、不放棄嘅態度去面對逆境，「哈哈！我學你啫Paco。我能夠生存到今時今日，係同唔去諗以前嘅光輝好有關係，無論有咩問題，都要解決o架，解決咗我就唔會再諗再停留。如果唔係咁，我已經跳咗樓好耐啦。
「好似我以前係滴酒不沾嘅，而為搵食，要見客social，我就喺公司同啲同事，一齊隊酒練酒膽酒量，所以今晚先可以同Paco你飲咋！」
勝瓜田雞（$89）呢個食材組合，出奇地搭配，有新鮮感。
干煸圓蹄（$128）以煸形式烹煮圓蹄，入口感覺唔肥膩。
宮爆蝦球（$188）為嗜辣及海鮮者必試菜式。
鮮見正宗川菜
哈哈哈！我除咗以酒會燦哥同Paula之外，今晚嘅飯敍地點「尚川宮」，都係我精挑嘅，因為餐廳嘅川菜正宗，我梗係要公諸同好啦！餐廳老闆劉小姐，喺國內係設計師，都係嗜辣人士，佢一心將以最正宗手法烹調嘅四川菜式，帶嚟香港。
「我哋好多食材都係喺四川直送，其中嘅四川野生茶仲係全港獨有，茶原本產自香格里拉同四川嘅交界，屬於零污染茶葉，最啱用嚟清理味蕾，回一回氣再食過。」
「尚川宮」老闆劉小姐（左）及大廚（右二）悉心安排今晚飯敍菜式。
我期待同燦哥合作嘅機會，先擊掌為記！
豆湯魚（$129），味道既清且甜。
椒香豬手（$78）皮脆肉嫩，佐酒一流。
鮑魚涼粉（$138）係國家領導級菜式，只此一家。
