田少走精面 左報重炮轟

臨近選舉，阿爺點睇自由黨，十分之敏感，因為會影響選票分布。政圈老友留意到，上星期親中報章《文匯報》用顯著版位登咗篇評論，題為「自由黨搖擺不定，難以取信於人」，直斥該黨去政府總部請願，要求押後國民教育，跟隨反對派起舞，學人哋抽水，再次搖擺不定，左右逢源兩面討好，文章又重提該黨於當年廿三條事件臨陣倒戈，用詞都幾重幾辛辣。

老友指，自由黨為贏選舉走精面，阿爺已好唔likey，特別係關乎國民教育嘅大是大非，就更加不滿，左報開炮砌佢，反映雙方再非友好關係。

《文匯報》以顯著版位直斥自由黨「搖擺不定」，咁砌法同田少強闖新界東搶位有關。

情況搞成咁，亦同選舉爭位有關。今次田少捲土重來，再殺入新界東，親中陣營原本力撐葛珮帆同龐愛蘭上位，田少加入戰團對佢哋有一定威脅，而佢為咗必勝，搵周梁排第二名，搶票能力增加，分分鐘令龐愛蘭再飲恨，中聯辦對田少咁玩好唔高興。

阿爺唔妥自由黨，令該黨部分核心人馬出現離心，入黨多年嘅中常委陳振東，就因為不滿阿頭嘅立場，已去信辭職。佢仲披露自由黨中常委未討論過國民教育問題，就操去請願，令佢反感。