大班電台危危乎 股東迫執笠

鄭大班個數碼廣播電台（DBC）開台唔夠一年，就面臨執笠危機，部分股東唔肯再科水，表面上指呢盤生意賺唔到錢，在商言商，冇理由掟錢入無底深潭，但更大原因，係唔likey電台變成「反梁基地」，大班做英雄，自己就做老襯，不如執咗佢算數。

電台上周五開董事會，討論泵水五千萬，維持電台營運，但持有兩成股權嘅黃楚標，及揸一成股權嘅李國章，擺明唔會科水。黃老闆同外面講，個電台接收唔好，又無廣告，邊有錢賺呀，依家又叫股東夾五千萬，再咁燒落去，幾時先完呀！佢係商人，蝕本生意唔會做。

鄭大班（右）要求黃楚標（左）等股東科水，但佢同李國章睬你都傻，但又唔肯畀大班發新股，咁樣落去電台隨時乾塘。呢場暗鬥內裏有政治原因。

股東唔科水，其實非冇錢賺咁簡單。知情人士講，黃楚標等當初參與搞DBC，以為係撐政府，爭奪傳媒陣地，唔諗住賺大錢，因當時鄭大班係「煲呔針」，又係唐唐軍師之一，立場好清楚，但估唔到形勢逆轉，振英哥最後勝出，背後更獲阿爺大力支持，大班為咗重振往日「十點前特首」雄風，電台由早到晚幾個節目不斷向新特首開火。黃老闆多數生意喺大陸，當然好唔自在，至於另一股東李國章，人人都知佢係梁營重量級人物，又入埋行政會議，更加唔想DBC變咗「反梁電台」。

知情人士指，黃楚標同李國章反對公司發新股集資，攤薄自己股權，亦唔願意將自己嘅股權讓出，咁嘅情況下，電台好快就乾塘，除咗關門大吉，冇其他選擇。據知李國寶同另一股東黃子欣亦唔想再玩，幾個人加埋已佔一半股權，睇嚟電台難逃沒頂厄運。

除咗政治原因，DBC經營情況亦好唔靚仔，電台開台至今，廣告收入少之又少，但皮費唔輕，大班開大個頭，重金招攬多位王牌DJ，電台仲未搞好接收，已豪灑金錢，結果彈藥消耗甚速，所以要急急向股東要求泵水。

據知電台近期已努力節流，上月就宣布全部職員一律減薪百分之二十，有人不甘薪酬被削，毅然跳船；此外，部分重磅DJ亦被斬纜，搞到反目成仇。