味千拉麵 解極唔清
一家企業一再發放不準確資訊，對於呢啲公司，一言只有奉勸投資者三個字——「沽之哉」。味千拉麵（0538）之前畀大陸傳媒踢爆，話佢標榜嘅豬骨湯底，竟然唔係用豬骨煲出嚟，只係用湯粉調配。
味千無奈承認湯底確實唔係豬骨煲出嚟，但就死撐話個湯粉係有豬骨成分，更話獲得中國農業大學驗證。點知好衰唔衰，農大隨即發聲明，清楚咁講話未驗證過味千任何食品。原來幾年前嗰啲湯粉係由中國烹飪協會拎去畀農大檢驗，並無打正牌頭話係味千。而且，味千究竟係咪用呢隻湯料，農大亦唔清楚。
解釋再解釋都除唔到公眾疑慮，你話以後佢發布任何消息，叫啲投資者或顧客點相信佢？
