品味聯合國
今晚嘅「金牌飯局」,我只可以用「聯合國」嚟概括,哈哈哈!一次飯局4位嘉賓有齊港、台、日、巴西4國元素:香港代表有我多年戰友之一蘇永康,台灣代表有model徐自璇(Cindy),日本代表係松岡李那(Linah),而巴西代表就係近期人氣急升嘅馬瑙(Kate),將各國風情共冶一爐。
既然各嘉賓嘅背景咁豐富,我就特別挑選咗闊別香港市場7年嘅「圓山台灣料理」,作為今晚飯局地點,畀呢個「聯合國」嘉賓組合,品嘗一下真正出色嘅台式風味。
今晚邀請到Cindy、阿康、Kate同Linah(左至右)擔任嘉賓,大歎台式美食,雖然各國嘉賓語言不同,但係一講到食,全部嘉賓都不乏話題。
細訴台食緣
一講起台灣料理,我就不得不提昔日對舊「圓山」嘅支持,呢間餐廳可以講係我當時嘅飯堂,最近知道「圓山」回歸,我梗係要率先一試啦!
對於台灣料理,其實阿康同樣係專家,除咗因為佢喺台灣發展得相當得意之外,阿康嘅「台緣」原來要追溯到1976年。「我爸爸喺1976年帶我去『欣葉』食台灣料理,當年佢點咗好多菜式,但我有最深刻印象嘅,就係一道叫蛋黄肉嘅菜式,今晚我見到都有呢味菜,即刻多咗一份親切感。」
哈哈哈!我即時把握機會,問阿康究竟蛋黃肉有咩令佢咁難忘啦!「呢道菜其實有啲似廣東菜嘅鹹蛋蒸肉餅,而且肉質更加鮮嫩,肉汁用嚟撈飯簡直一流!」
一道菜勾起阿康兒時回憶,令今晚嘅飯局增添多一份情懷,咁自然要乾一杯慶祝一下啦,乾!
今晚除咗3位靚女之外,我哋仲有特別嘉賓:錢國偉(左一)同Ba(陳達志,右二),陣容鼎盛!
台灣烏魚子($158)以口感似燒餅嘅餅皮包裹魚子,中和鹹味。
圓山之拼包括四款台式小食,當中以用墨魚、蛋黃、火腿同青豆炮製嘅蛋黃小卷,最得阿康歡心。
古法燜東星斑(時價)係以台灣秘製醬汁燜魚,配上涼瓜,味道多層次!
溫室南瓜炒鮮鮑($188)嘅南瓜特甜,更能帶出鮮鮑魚味道。
新晋美廚神
數台式情懷,一定唔少得嚟自台灣嘅Cindy啦!佢係06年奧克蘭華裔小姐嘅五料冠軍,有自我一套美容心得之外,仲係廚藝高手。
「我平時最鍾意煮嘢食,整蛋糕、壽司、烤羊排、酥皮海皇湯都係我嘅拿手菜式;但係台式美食我就唔係咁在行,都係以食為主,最愛係食台式嘅烤香腸。」
今晚有好多比較傳統嘅台灣料理,好似川歸蝦湯等,都係Cindy從未品嘗過嘅「家鄉菜」,所以我請「圓山」嘅餐飲總監陳玉玫(Mei)講解一下嘞。
「呢個菜式最大嘅難度係搜尋盛載嘅器皿,依家呢個係我哋專程喺台灣揾專人製造,加上傳統嘅古法炮製,就算喺台灣本土都好難搵到嘞。」
Mei(左)為阿康(右)同Cindy(中)講解炮製川歸蝦湯嘅方法,兩位嘉賓都對美食大感興趣。
台灣花雕蟹(時價)以台灣花雕加雞油炮製,係Kate全晚至愛。
川歸蝦湯($138)可謂全晚精髓所在,盛器之外,所有炮製湯底嘅藥材都要以台灣米酒泡兩日,係用心之作。
蝦蟹贏歡心
點解我特別請Mei解說?係因為呢味川歸蝦湯係日本代表Linah嘅最愛菜式,佢話:「呢個湯嘅味道好特別,可能係因為有藥材同台灣米酒嘅關係啦!所有材料嘅味道好配合,而且蝦亦都夠新鮮,好好味!」
至於有巴西血統嘅Kate就話:「我好鍾意食海鮮o架,今晚嘅花雕蟹係我嘅favourite,哈哈!我不嬲都好鍾意食蟹,而且唔怕麻煩,海鮮嘅味道係其他食物難以代替嘅,所以我食咗好多呀!
「其實,我之前冇試過台灣料理,今次係第一次,一食我已感覺到廚師好有passion,perfect!」
哈哈哈!有熱情先可以做出咁地道嘅美食,先至係真正致勝之道!我哋齊齊乾杯祝「圓山」開業大獲全勝!乾!
我同Cindy、Kate、Mei、阿康、Linah同「圓山」顧問楊先生(左至右)今晚盡興盡情,梗係要合照留念啦!
陽明山劍笋($138)夠晒清淡,平衡今晚味道濃嘅菜式。
薑汁鮮雞腰($138)味道鮮美,薑汁將雞腰味道提升,值得一試。
三杯雞煲($98)係另一具台灣風味嘅菜式。
阿康大讚嘅蛋黃肉($78),肉嫩味濃,真係啱晒送飯。
「戀夏」生力軍
今次我特別邀請嘅3位靚女嘉賓:Cindy、Kate同Linah(右圖左至右),全部都有份喺我監製嘅電影《戀夏戀夏戀戀下》,成為影壇生力軍。3位靚女同屬model出身,有別於一般o靚模,甚有大將之風。