電影除咗係娛樂，我作為電影人，更加欣賞言之有物嘅電影。一向有heart嘅電影人冼國林師傅，最近有首次執導嘅作品、題材反映社會現況嘅《我們的6E班》即將上映，我就誠邀佢擔任今次「Paco巨星飯堂」嘅嘉賓，細說佢嘅新作背後嘅故事。

冼師傅仲率領電影兩位女角：葉芷如（Lemon）同周嘉莉（Rachel），我就帶三位嘉賓去到位於尖沙咀嘅「So Thai So Good」，品嘗特色嘅泰fusion菜式，暢談電影嘅深層訊息。

首次執導電影，冼師傅為咗節流，大膽起用新人Lemon（右）同Rachel（左），擔任《我們的6E班》嘅女主角同女配角，發放正能量。

宣揚同心

曾經為《葉問：終極一戰》、《葉問前傳》及《競雄女俠．秋瑾》等多部功夫電影，擔任出品人及監製嘅冼師傅，對電影充滿熱情，但係佢話熱情並非佢今次執導嘅原因。「今次我第一次做導演，唔係因為我恨做，係budget有限，我請唔到大導演，但搵新導演我又驚，咁不如死喺自己手上啦！

「好多人一睇個戲名，都以為係青春校園戲，其實部戲係關於香港嘅社會現象。兩年前我同班朋友，傾香港嘅一啲事，講到少數族裔、新移民，佢哋係比較少得到關注嘅人，我就希望為社會服務，拍一部戲發放正能量。」

香港係一個多元社會，新移民同本土居民容易產生各種矛盾同衝突，冼師傅認為社會共融問題，係值得大眾關注。「戲入面嘅情節，取材自真人真事，我想帶出社會共融嘅訊息，戲中有句對白『不分你我他，香港是我家』，我希望透過部戲，將唔同族群嘅互相排斥，變成互相鼓勵。」

冼師傅仲藉電影行善，為香港唔同族群，出一分力。「電影所有利潤都會捐助社會共融基金，用嚟做獎學金，我希望唔同族群嘅朋友，都可以融入社會，有困難或者有需要嘅時候，都可以得到幫助。」

我帶三位嘉賓去到位於尖沙咀嘅「So Thai So Good」，品嘗特色嘅泰fusion，暢談電影理念。

除咗親自執導，冼師傅仲喺佛山建立「國藝影視城」，打造廣東荷李活。

五年前拜冼師傅門下學詠春嘅Lemon，本身都係跆拳道三段嘅高手，睇得又打得。

Lemon喺戲中飾演初出茅廬嘅老師，喺任教多種族嘅6E班之時，常要見招拆招。

電影籌備兩年，喺冼師傅眼中，最艱巨嘅任務係尋找合適嘅南亞裔演員，耗時半年先搵到兩個適當人選，包括彭志偉（右三）。

冼師傅盛讚男主角孫耀威非常專業，主動為角色做research。

新手上路

電影題材咁特別，雖有誠意，但受成本所限，冼師傅話：「我見孫耀威咁多年都咁靚仔，喺中港台又有咁高嘅知名度，所以就邀請佢做男主角，至於女主角就搵番我公司『國藝』嘅新人Lemon，配角就係Rachel。佢哋三個都飾演教師， 當中嘅師生矛盾、同學紛爭同家庭衝突，全部都好貼地。」

Lemon跟隨冼師傅習詠春五年，今次首次擔正做女主角，佢表示甚有壓力。「尤其孫耀威係一個經驗豐富嘅演員，同佢做對手戲，好自然會緊張，不過佢好好，會教我點樣投入角色。但係最可惜嘅係，我同孫耀威喺戲入面係完全冇感情戲，只係同事關係囉！

「師傅都有提點我，因為戲入面有場打戲，講我去救學生，師傅喺拍之前，就搵人同我夾動作，係一個好好嘅經驗。」

講到今次飾演班主任，Lemon笑言自己能勝任角色。「一來角色要對住唔同類型嘅學生，需要包容力；二來我好鍾意打戲，所以都幾啱我，真係多謝公司畀機會我。」

Rachel曾被網友稱為「六合彩女神」，廿七歲嘅佢喺新作挑戰訓導主任一角，難度甚高。

雖然欠缺華麗嘅演員陣容，但電影取材夠晒貼地，充分反映香港嘅多元情況。

冼師傅話今次拔刀相助嘅演員，大部分連利是都冇收，就係為咗宣揚「不分你我他」嘅信息。

麻辣教師

冼師傅補充話：「孫耀威今次要做麻辣教師，以另類手法幫學生返回正途，佢話以前自己都係個壞學生，如果唔係成績唔錯，一早就被學校踢出校。」

同孫耀威有唔少對手戲嘅，仲有另一位新人Rachel，佢飾演訓導主任一角。「我同孫耀威都係冇感情戲，但同范振鋒都有少少嘅，本來ending有場戲，講佢kiss我塊面，但佢怕太太唔鍾意，所以之後就cancel咗。」

冼師傅特別感謝眾多客串嘅演員，「都係因為budget關係，今次好多客串嘅演員，好似張國強、麥包、方力申等等，全部唔止係拍膊頭，直情連利是都冇！有一個演員仲叫我唔好開名，拍完自己仲攞咗幾萬蚊出嚟，買飛支持部戲請人睇，真係好有心！」

金柚沙律配脆香魷魚（$70），香脆魷魚配上清香金柚，加上泰式調味，感覺非常清新。

黃金蝦配秘製醬汁伴車厘茄沙律（$90），黃金蝦拌以泰式香料秘製醬汁，更能帶出蝦嘅鮮味。

芝士焗紅咖喱牛、豬肉丸配燒薯角（$95），濃郁芝士與紅咖喱，令味覺享受新刺激，加上彈牙嘅肉丸，口感飽滿。

泰式三文魚他他配多士（$85），挪威三文魚加上香茅青檸汁，係開胃前菜不二之選，配上多士一同入口，提升口感層次。

冬蔭公海鮮薄餅（$135），將泰式傳統風味冬蔭公，以西式薄餅演繹，再加上鮮味海鮮，味道更有層次。

芝士焗冬蔭公大蝦海鮮炒飯（$115），惹味嘅芝士遇上香辣嘅冬蔭公，味道加倍濃郁。

鮮雜果忌廉窩夫（$55），新鮮水果配合自家製鬆脆窩夫，相當豐富。

香芒拿破崙（$60），吉士香甜味道恰到好處，一層層拿破崙薄脆鬆化非常，滲出輕輕嘅牛油香氣，係甜品Fans必選。

So Thai So Good
地址：香港九龍尖沙咀彌敦道132號美麗華廣場一期1樓105號舖
電話：25746262