上市公司老闆 炒股仔蝕入肉
蠱惑上市公司合股、供股再向下炒，呢套手法將小股民殺到遍體鱗傷，曾經做過財經名嘴嘅呂志華，早前協助啲小股民開記者會申訴，但似乎收效唔大。呂志華近日繼續奔波，上兩個禮拜更向港交所遞請願信，希望監管機構注視呢個問題。
呂志華建議，監管機構唔應該容許啲公司合股後，即時宣布供股，而供股價更唔可以大幅低過現股價等等。不過，港交所同佢講，要時間詳細考慮，更需要與好多部門互相配合！呂志華認為保障小投資者刻不容緩，遲啲會向財經事務局局長陳家強，以及證監會反映意見。
呂志華仲話，唔好以為小股民至係受害者，即使上市公司主席，都畀啲壞公司玩起。佢識有家上市公司老闆，有次睇到某間公司盤數幾好，於是揼咗唔少錢投資，點知買咗之後，公司供股供到佢，最後要勁蝕收場。
