日資經紀 風光不再
中資股票行抬頭，反之日資證券行就今非昔比。早前日本大地震兼核洩，唔少人擔心日本行撤資，但問題並非想像嚴重，事關一言跟老一輩經紀傾開，佢哋話日資喺香港嘅影響力，跟十多年前不可以同日而語。
有位喺日資大行做嘅老行尊話，佢哋最風光係八十年代尾，嗰啲喺野村、日興或大和做嘅經紀好威。話說當年佢有位喺野村做股票經紀嘅老友，某次食飯唔記得帶錢，只係放低張卡片，間食肆就可以畀佢記帳。喺嗰個年代，日資行簡直係金漆招牌。
不過九十年代日本經濟泡沫爆破，日本經濟衰足廿年，九七年亞洲金融危機後，四大行嘅山一仲要畀台灣佬買咗，變成現時的京華山一。今時今日，香港最大兩間日資行野村同大和，都已淪為B組證券行（即以成交額計唔入頭十五位），B組內約五十多間行，佔大市總成交約三成，即平均每間B組證券行市佔率不足百分之一。
