經紀仔炒車位 賺錢多過全年佣金
做地產經紀有時唔係單靠份佣,有啲醒目經紀,因為掌握市場資訊較別人要快,於是自己炒埋一份,食啱個勢,搵錢隨時多過全年佣金;特別係啲經紀仔,賺錢唔似啲經理或主管咁豐厚,有時炒一兩層樓,成年收入都無憂。
通天早前就跟一言講,話有個喺香港仔做經紀嘅o靚仔,舊年十月時,以一百零六萬買入一個深灣軒車位;四個月後,以一百三十八萬賣出,短短幾個月就賺咗幾十萬,炒一轉車位,好搵過一年佣金,難怪個經紀依家無心工作,返工就係留意有冇車位炒。
經紀仔點解咁醒?原來佢見深灣軒毗鄰嘅南灣,嗰處車位供應十分有限,他估計南灣入伙後,啲住戶要租或買車位,深灣軒係首選,畢竟位置上貼近南灣。個經紀仔就係睇到呢個機遇,於是買入深灣軒車位,咁啱呢段時間車位熱炒,價格不斷上升,早前南灣發展商新地更推售車位,售價介乎一百四十五萬到一百五十八萬,高出深灣軒車位一到兩成,經紀仔見機不可失,即時出售套現。