人生，難免要經歷高山低谷，才算精采。〇二年港姐季軍胡家惠（Cathy），十年前進軍商界，旗下的即食湯包生意，於疫市下營業額竟升十倍，早前更獲「青年女企業家」獎項。
風光背後，胡家惠於五年間，先後經歷前夫背叛、離婚、躁鬱症及自殺。劫後重生的她，積極創業及落區，為長者送上靚湯及物資。「o依家可以留番條命，以後就要愛惜自己生命。我仲有好多嘢要做，要照顧好兩個女，如果胡家惠死咗，好多老人家無湯飲。」
經過風雨洗禮，令胡家惠更享受放晴的珍貴。

三十九歲的胡家惠廚藝了得，在公司打造了一個十多萬的開放式廚房，方便宴請朋友及網上拍片教煮餸，「我十一歲就開始要煮飯、煲湯，因為媽咪要返工，我就負責煮飯俾佢哋食，我好鍾意o架！」

胡家惠人緣甚佳，她早前上薛家燕的電台節目，一同分享飲食文化。

慈善事業

訪問當日，胡家惠在二千多呎新辦公室內的開放式廚房，正忙着烹調韓式炆牛肋條，香氣四溢，她還親切地為記者端來一碗熱騰騰的老火湯。
「之前個office得三百呎擺滿貨，啱啱先搬嚟。我一八年開始做湯包，連埋office投資咗二百萬，逆市擴充係因為湯包生意好，呢年生意額升咗十倍以上，可能因為疫症好多人唔想出街，我啲湯包網上有得賣，無味精又健康。」
她做「靚湯」的初心是為慈善送給獨居長者，她研製了幾款有營的即食湯包，找來食品廠的好友幫忙生產小量，估不到一年後，可發展成生意，「要賺到錢，至可以幫我繼續做更多慈善。我媽咪喺老人院做護士，我細個聽媽咪講好多老人家好慘，我希望將來大個，可以幫到呢班老人家。我十六歲嗰年，就開始統籌同學一齊做義工，幫隱閉長者清潔屋企。」

韓式炆牛肋條，配上白飯和老火湯包，無得輸！

自尋短見

並非典型大眼美女的胡家惠，〇二年十九歲時已參選港姐，以「黑馬」姿態獲選季軍。貼地的她，從沒想過打着港姐光環踏入豪門，「我嗰時得十九歲咋！點會咁早結婚咁恐怖？當選要出席好多活動，好易識到好多有錢人。我無去應酬，但我見到好多人選完就即刻結婚，有啲同屆港姐嘅仔女，都已經十幾歲，我算遲婚。」
以愛為先的她，一一年下嫁當時寂寂無名的室內設計師邱仲平，當時無傭人，洗衫煮飯都由胡家惠一腳踢，夫妻同心打江山。至一六年公司在創業板上市，二人身家暴升至過億。
胡家惠當時陀着細女，搖身一變成上市公司的主席夫人，但卻同時發現丈夫出軌。晴天霹靂的她，患上產前抑鬱，令她情緒崩潰，更萬念俱灰地曾多次自殺，開亡命飛車到飛鵝山想跳山、到酒店服藥自殺、於東區走廊高速欲撞車及用鉸剪插手自殘等。
「我幫佢（前夫）搞上市，佢做咗上市公司主席，一發達就有女人，成果就俾第二個女人享受。我唔甘心！我明明係闊太，買嘢唔使睇價錢，買樓唔使睇首期，嗰時一個月使佢幾十萬發洩，但真正嘅我其實好慳家。」

口齒伶俐的胡家惠，當選港姐後被委派做綜藝及TVB兒童節目等的主持，她兩年後離開，進修酒店管理學位，曾做空姐、公關及市場銷售等，打工七年後創業開公關公司、韓國護膚品店等，銳意從商。