單親媽媽既要照顧子女，又要兼顧事業，絕不輕易。兩子女之母的Danielle Graham，就是當中的佼佼者。
九八年憑着天使面孔入行，拍了一個護膚品廣告一炮而紅的混血名模Danielle，自一六年離婚後，她就與一對分別十歲和九歲的子女定居吉隆坡，近年專注發展廚具事業，又出食譜教煮餸，實行將興趣轉化成事業。
煮得一手好菜的她，不時與子女一起下廚，享受親子樂，「疫情下，唔少廣告同模特兒嘅工作取消咗，但反而多咗時間陪仔女。煮一餐飯俾佢哋食，變成我生活中最重要嘅一環，我非常享受o依家嘅生活。」
現年四十二歲的她，雖然感情未有着落，但家庭與事業，已充實了她的生活，她也樂在其中。

廚藝了得的她，不時於網上教煮美食，吸納不少粉絲。

Danielle一家於今年初搬新屋，希望有更大的地方讓小朋友走動。

自小愛入廚

自從一月到峇里參加瑜伽營，回到馬來西亞後，Danielle與家人一直沒有外遊。因疫情關係，馬來西亞於三月份實行「鎖國」措施，她的子女Benjamin及Sophia沒法上學，但一家三口在家裏也挺忙碌。
「小朋友喺屋企透過網上學習，我就不斷諗啲活動俾佢哋，好似畫畫、跳舞、玩拼字遊戲等。Sophia鍾意跟我煮飯，Benjamin就鍾意打機多啲，兩個喺屋企無時停，有時都幾頭痛o架！我會要求佢哋朝早起身後，整理自己嘅牀鋪，照顧狗狗，學吓獨立，唔係淨係掛住玩。」
近大半年，人人留家抗疫，Danielle亦不敢偷懶，在家中忙於食譜推廣，「呢個疫情，令我好多喺香港同東南亞嘅工作都取消咗，不過都要接受現實啦！錯有錯着，疫情令更多人留家煮飯，仲多咗人試我嘅食譜同餐具添。」
出生於馬來西亞的她，父親是愛爾蘭人，母親是馬來西亞華人，她自小已隨父母入廚，「記得五歲時，我媽媽嚟學校，煮炒飯俾我啲同學食，我已經覺得佢好叻，爸爸亦有教我煮薯蓉，所以我細細個，廚房已經係我嘅小天地。」
在香港，廚房一向是小朋友的禁地，但在Danielle的IG裏，不時見她的子女拿刀切菜，而且非常落力和純熟，她更不時搞搞新意思，跟子女一起拍片煮餸，是一位非一般靚媽。「佢哋細細個開始，我已經俾佢哋入廚房，多啲接觸食物，先會珍惜。囡囡最喜歡食三文魚，每日都要食飯同蔬菜；而囝囝就鍾意食肉，我哋最近一齊拍咗條片，教人整牛扒，好多人Like，佢哋都好有滿足感。」

她喜愛大自然，平日鍾意閒坐露台，放空一番。

早前她拍片教煎牛扒，Benjamin亦有大顯身手，負責切扒。