人生道路上，充滿選擇，要怎麼走，邊走邊學。大概人人如是，包括有王牌經理人之稱的黃柏高（Paco）。
搖滾Band霸AC/DC的〈Highway to Hell〉，一度是他的「座右銘」，於樂壇、影壇呼風喚雨，一刻也不能停下來。愛以酒會友的他，由干邑、白蘭地，到威士忌、茅台，邊酒邊學習，一聲「乾！」，盡顯豪氣。
直至一九年七月，其健康突然出現狀況，才令一向步伐急促的他，有停歇的時間。
「一路以來，我成日都諗住highway to hell，一鋪玩完，反而冇諗過要面對，喺治療期間，意志好緊要！我嘅情況已經係同類病人嘅10%，但係都好辛苦，又講唔到嘢，點樣去克服、點樣去堅持，都係同意志力有關。
「過咗最辛苦嘅時候，都要一段長時間去調理，咁啱疫情令所有嘢都停咗落嚟，我可以有充足嘅時間回復。」
笑指他已從highway to hell轉至highway to health，Paco聞言即發出招牌的豪氣笑聲：「哈哈哈！啱呀！我呢家先明白，做人最緊要嘅，係身體健康。」
說話時中氣十足，七十一歲的Paco，經歷過生死一線間，領略健康的珍貴，搖滾精神依然，更能笑看人生。

 

悟

致電相約Paco做訪問，他第一句是：「好耐冇聽過你把聲嘞。」原因是他為《東周刊》主持專欄的十四年間，我有幸同行當中的十年，也因在一九年已得知，其健康出現狀況。
「係訪問阿Sa（蔡卓妍）嗰次。」當事人仍記得最後一次主持專欄的受訪者，那一天，是一九年七月十八日，訪問開始前，Paco跟我說，之後的訪問要暫緩，未幾便得悉他要為自己的健康抗戰。
回帶Mode完結，三年後的訪問這天，穿上其最愛的軍Look外套，Paco駕着他的墨綠色Jeep，容光煥發地來到本刊位於工業邨的影樓，展現成功捍衛健康的喜悅。
「當時完全冇諗過，身體會出現狀況，我不嬲做嘢都係豪邁、不顧一切，連飲酒都係，去到咁嘅年紀都仲係咁瘋狂，生活又顛倒晒所有時間，拉到咁『行』，終於負荷唔到。」
發現狀況後，Paco已從速接受治療，到病癒的十個月間，每一天也是對其意志力的挑戰。

 

「喉嚨係痛到講唔到嘢，要將想講嘅嘢寫出嚟；想飲水，一飲落去又好痛，用飲管飲都唔得，要一滴一滴咁飲。
「以前我好怕肥，所以要成日Keep住fit，但一病我就暴瘦，個人冇晒精神好憔悴⋯⋯面對呢啲危機，先會知道健康係幾咁重要。」
現在Paco精神飽滿，全因他把昔日顛倒的生活習慣，撥返正軌，更成為養生達人。「呢家我一起身就飲一杯溫暖嘅水，養成一個定時飲水嘅習慣。每日朝早七點起身，之後做吓適量嘅運動，始終呢副機器都用咗咁多年，要郁動吓保持狀態。
「飲食就完全以清淡為主，我冇食紅肉，又唔食甜食，鹽份都要少，因為鹽份高嘅話，血壓相對都會升高。」
還有他對睡眠的感悟：「以前一醉就瞓，瞌一瞌，咁係唔得嘅！呢家我六點就食晚飯，八點就瞓覺，有充足嘅睡眠時間都好重要。」

電影《殺破狼》系列是Paco於影壇的得意之作，除戲名無獨有偶地跟其命盤一樣，有齊的七殺、破軍和貪狼三大星外，一七年的《殺破狼．貪狼》，更為古天樂贏得金像獎影帝。

Paco自喻為Rocker，即使這些年他主力製作電影，他也有跟Joey Tang合製新曲，「係Rock and roll嚟o架！好型！」