當風濕遇上風
今次大題嘅搞笑元素,係為今次「金牌飯局」嘅嘉賓組合而設,正確啲嚟講係由其中一位嘉賓所創作,哈哈哈!相信唔使我多介紹,你哋透過電視,或者Youtube,都見識過祥仔(阮兆祥)同Michelle(盧覓雪)合體變「Twins」嘅搞笑威力啦!
上次「Twins」以一曲〈風箏與風〉瘋魔全港,今次「Twins」喺12月舉行嘅《荃加福祿壽宇宙最長演唱會》亦係其中一組嘅「表演嘉賓」,「金牌飯局」就率先請兩位預演一吓,將歡樂無限放大!
今晚同祥仔(左)、Michelle(右)大歎意大利菜。我嘅威力,令Michelle「暫別」枱上嘅Mojito,同我暢飲威士忌!
相識多年默契
今次我挑選咗位於蘭桂坊嘅意大利餐廳「VABENE」作為飯局地點,而一向識飲識食嘅Michelle亦係餐廳嘅食客,不過佢話:「同Louis(祥仔洋名)一齊出席飯局,今次係第一次。」
哈哈哈!既然兩位畀咗咁珍貴嘅第一次我,我梗係一早着餐廳預備最好菜式畀「Twins」;同時我都要為你哋服務,要兩位當事人解說吓組「Twins」過程啦!
Michelle將解說過程留畀「家姐」祥仔,「其實最初我哋為《荃加福祿壽》度橋嘅時候,有個趣劇環節《Sat in the City》係用《Sex and the City》作為藍本嘅,當時我要搵一個易畀觀眾認得而我又handle得好嘅character,我就第一時間諗起Michelle,佢食家形象深入民心,而且又sexy(盧:「哈哈哈!多謝!」),所以就有『大Ex』呢個角色嘅出現。
「而且到咗最後一集,Michelle肯同我拍一個〈風箏與風〉嘅MV,為成件事錦上添花啦!」
Michelle再補充話:「初初Louis扮我嘅時候,有雜誌記者打畀我,問我有冇睇過,仲話佢醜化我添,我完全冇理會過,亦都唔mind,話晒佢扮我,對我嚟講都係honour嚟嘅。我同Louis識咗好多年嘞,記者『挑撥』唔到我哋嘅深厚感情嘅。」
哈哈哈!Michelle喺傳媒界多年,自然同圈中出名嘅好好先生祥仔一樣相識滿天下啦,for friendship,我哋乾!
multimedia1 | |
香煎海鱸魚伴西芹根醬汁配新鮮蔬菜及韮葱,鮮味濃郁。 |
龍蝦沙律伴鮮牛油果、車厘茄及青瓜,配合以檸檬為材料嘅酸汁,夠晒醒胃。 |
祥仔與Michelle即刻示範當日拍《風箏與風》MV嘅情節,盡顯默契。
食家Michelle大讚沙律材料配合得宜。
入會展再合作
一杯過後,Michelle繼續憶述同祥仔當日拍MV嘅趣事,「由頭到尾,我同Louis都係好認真咁對待呢件事,首先我哋入咗TVB嘅錄音室錄歌,我好認真咁唱㗎,之後就再入廠『咪嘴』拍MV,望吓天,又望吓唔同嘅角度(兩位同時再即席示範),成個過程都好認真。
「可能因為我哋咁認真去對待成件事,出嚟嘅效果先會令觀眾睇得咁開心,我nephew(姨甥)話我知,呢個〈風箏與風〉嘅MV,喺Youtube三日嘅點擊率,有超過30萬人次。我家姐仲好笑,佢話我同Louis仲似樣過我同佢添!哈哈!」
正因為「Twins」喺坊間嘅迴響咁強勁,祥仔今次同《荃加福祿壽》班底開騷,亦都預埋Michelle一份,令「Twins」殺入會展,祥仔預言:「不過我哋唔會再唱〈風箏與風〉,要有新鮮感畀買飛入場嘅觀眾!」
Michelle就為殺入會展,話要做足準備,「我度晒期去同佢哋排舞㗎嘞,上次為『金像獎』做司儀,喺幾千名現場觀眾面前,我已經緊張到腳震,今次仲要載歌載舞,一定要排到最好最熟!」
我哋齊齊品嘗正宗意式al dente(咬勁),祥仔仍未失其鬼馬本色。
帕爾瑪火腿、火箭菜及水牛芝士番茄醬意大利薄餅,係喺意大利街頭隨處可見嘅「零食」。 |
簡單嘅蒜蓉橄欖油及辣椒意大利麵,最考廚師功夫。 |
各區美食專家
Michelle同祥仔都係為老友兩脇插刀嘅義氣仔女,講到點解「Twins」嘅友誼可以維繫咁多年,Michelle話:「Louis同我都有啲common friends,我哋就喺其中一次嘅聚會認識,佢好多時都因為開工而晏啲到,但每次到場佢都買咗好多特色美食,有時係深井燒鵝,有時係唔知邊度嘅好味牛雜,種類好多,佢都係食家嚟㗎!」
祥仔就話:「我好鍾意同朋友分享,sharing brings the greatest happiness,食到好味嘅正嘢,一定要同人分享,先有更大嘅喜悅,同我做藝人一樣啫,只要觀察到好嘅素材,我就先袋入自己個袋,到啱用嘅時候,再拎出嚟同觀眾分享,亦都係一件開心事!」
講得好,仲同「金牌飯局」嘅理念不謀而合,今晚我同Michelle、祥仔分享好味嘅意大利菜,都係咁happy,乾!
甜品係意大利芝士雪糕,不論Michelle或是祥仔都讚不絕口。 |
烤美國牛柳伴香煎蔬菜及薯蓉集合意、美特色。 |
「家姐」祥仔同Michelle分享佢度新橋嘅靈感,o氹得「細妹」笑不攏嘴。
Michelle同星島雜誌集團行政總裁黎廷瑤(右一)相識多年,加上祥仔,令飯局更多話題。
今晚嘅菜式由只有28歲嘅意大利籍廚師Paolo炮製(右),我哋梗係要多謝佢嘅心思!
VABENE
地址:中環蘭桂坊17-22號地下
電話:2845 5577
即席試聽新歌
祥仔為咗12月嘅演唱會,特別同「福祿壽」拍檔王祖藍、李思捷創作串燒歌《宇宙最長Episode 1》,飯局當晚我就即席試聽(大圖),而Michelle則大讚以《星球大戰》作創作概念嘅演唱會海報(小圖),畀足面祥仔!