主頁 > 專欄 > Paco巨星飯堂 > U40峰會 2010 年 10 月 26 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

U40峰會

你哋有捧「金牌飯局」場，一定知道我請嘅嘉賓，代表晒香港不同階層，今次我帶你哋集體「升呢」，同「亞洲電視」新一代嘅高層，大歎位於灣仔嘅「留園雅叙」嘅新舊crossover上海菜式！

我知道，一聽「高層」，大家會聯想到一啲人生閱歷較豐富嘅人士，但係「亞視」執行董事盛品儒（James）同執行董事高級顧問白雲峰（小白），都係年輕有為嘅U40（under 40）高層，兩位梗係幹勁十足啦！

喺James（右二）同小白（右一）率領下，「星光三班」嘅于天龍（Sunny，左一）同08年「亞姐」姚佳雯（Eunice，左二），同我一齊歎住上海菜，傾談未來大計。

留園又解家園

今晚嘅飯局地點「留園雅叙」，其實係James嘅家業之一，我相約佢同小白飯局，亦挑選喺呢位貴賓嘅「主場」舉行。哈哈哈！咁我梗係趁呢個機會，請James講解吓餐廳嘅背景啦！「留園指蘇州留園，係我家族（盛宣懷）以往嘅產業，依家已經係歸國家所有。而89年嘅時候，留園先喺北角開業，主要因為當時嗰個地區嘅上海人多，到90年再搬咗去灣仔，仍然叫做『留園』，直至00年喺呢度開業，先成為『留園雅叙』，意思係畀一班朋友聚集咁解。」

我覺得「留園雅叙」特別之處在於佢哋嘅菜式正宗又好食，好似開胃幾小碟中嘅熟醉蟹咁，要用上等花雕等佳釀浸製熟大閘蟹兩日而成，工夫、心思都可見一斑，而我就一定係又食又飲啦！乾！

年輕人不拘小節，所以我同James（中）、小白（右）梗係話題不絕！

Sunny同Eunice都大讚熟醉蟹有心思。

James早前再開始出任埋「亞視」執行董事，集多項要職於一身，佢話：「我希望可以令『亞視』年輕化、活力化，即係將電視台年輕嘅一面show畀觀眾睇到。我知道之前『亞視』會畀人一種舊式嘅感覺，而我同小白就正正係努力為電視台洗脫呢一個image。

「嚟緊我哋會集中製作多啲屬於香港人嘅節目、劇集，另一方面，我哋製作咗一啲劇集嘅apps（程式），作為宣傳之外，亦都要畀外界知道，『亞視』係一個追得上時代步伐嘅電視台。」


小碟有糟蝦、熟醉蟹同陳醋蜇頭（左至右逆時針），各具特色。	另外三款小碟包括金華火腿、涼拌馬蘭頭同鹽水鴨，非常豐富。
	火朣翅係James宴客必備菜式。

注入新鮮氣象

James一邊發表大計，坐喺我身旁嘅「亞視」中堅分子——姚佳雯（Eunice）同于天龍（Sunny）亦點頭認同，至於身為執行董事高級顧問嘅小白，就即時補充：「我以前看過不少劇集，好像《天蠶變》、《大地恩情》、《大俠霍元甲》、《陳真》、《李小龍傳》等，全部都是『亞視』製作的，連現在舉世知名的甄子丹，也為我們拍過劇集，可是類似的製作近幾年已經少了，在我的感覺上，好像是一個巨人沉睡了。

我同James、小白、《東周刊》總編輯關慧玲（左至右），都用心欣賞呢味紅燒刺參！

「所以呀，我們的任務就是令這個巨人慢慢的醒過來，到他甦醒了，我有信心，可以重現以往的威力，讓香港的觀眾有更多的選擇。」

哈哈哈！睇到兩位年輕人對事業充滿熱誠，而且兩位都不約而同係首次涉足電視業，魄力十足，我就以呢一杯，祝佢哋大獲成功，乾！

我知道小白身兼博奇環保嘅總裁，博奇係中國首支喺海外（東京）上市嘅環保股。而私底下嘅小白，亦相當支持低碳生活，「哈哈哈！所以我現在就更加善用資源，努力搞好『亞視』，現在我每天都藉看電視學廣東話，基本上聽已經不成問題了！」


黑松露炒蝦仁火丁豆糅合上海菜同現代元素，係James大力推介嘅菜式。	紅燒刺參需時炮製，如果你要試，記住預訂！