中智藥業　憑中藥破壁飲片技術尋突破

現代人注重養生和調理身體，唔係有病先睇醫生，概念同中醫藥理論相符，所以中藥銷售近年穩步增長。喺內地，二○一七年七大類醫藥商品銷售總額超過二萬億元（人民幣，下同），中藥材佔六百一十一億元。至於中藥飲片，零售銷售達二百七十七億元，增長係各類中藥之冠。一個內地監測數據顯示，整體中藥飲片對零售藥店嘅銷售額貢獻由二○一五年百分之六點四，上升到二○一七年嘅百分之七點四。

以前我以為飲片就係將中藥材切成一片片，後來認識咗中智藥業控股（3737）主席賴智填，佢同我解釋，好多人都將中藥材同飲片混亂，但根據《中國藥典》二○○五年版，飲片係經過淨製、切製、炮炙處理成一定規格，可以直接用嚟作醫療調配和製劑，可作臨牀應用，佢仲講笑話就咁切開嘅只可以叫做切片。

中智藥業成功研發出中藥破壁飲片技術，喺中藥飲片之中開創咗一個新嘅類別。破壁飲片比普通飲片更進一步，除咗可以直接沖泡服用，品質亦更穩定。比較煲藥一般吸收利用率得兩、三成，破壁飲片可以達到九成以上。

呢項核心技術已經獲授權發明專利，公司近年以「草晶華」品牌將破壁飲片推出市場，二○一二至二○一七年，草晶華六年複合增長率近百分之七十四，係傳統中藥飲片嘅四倍幾。今年上半年，草晶華銷售同比增長五成七。

有今日嘅成績當然值得慶賀，但賴兄想當年，研發過程真係困難重重。中智藥業喺二○○三年已經成立專門團隊研究中藥破壁技術，由於投放資金好多，所以頭幾年收穫同付出唔成正比，甚至有朋友勸佢放棄。好彩賴兄份人都唔係咁易認輸嘅，終於喺二○一一年取得突破，出到標準並獲廣東省政府認可，加上政府大力支持中藥發展，令中藥破壁飲片呢個新類別產品一推出就受到市場歡迎。

中智藥業上星期公布中期業績，今年首六個月總收益升兩成九至五億五千七百萬元，期內利潤亦升兩成二至四千七百萬元。公司整體毛利率提高三個百分點到百分之六十二，其中製藥分部毛利率達到百分之七十二，連鎖藥店亦有百分之四十七。業績不俗，公司增派中期息兼派特別息合共四點三五港仙。我期望公司能夠逐步增派息，同股東開心share業績成果。

賴兄認為公司成績理想亦得力於品牌和營銷模式。營銷方面，公司喺主流連鎖藥店渠道嘅覆蓋廣泛，而醫院客戶亦增至一千二百八十間，加上新建立嘅線上平台，以及積極開發中小藥店連鎖同代理商，可謂開行turbo。

至於中智藥業嘅另一項業務連鎖藥店，以及新建立嘅線上藥店成績都唔錯。公司現時喺中山擁有二百八十四間自營「中智」藥店，其中八成半係醫保定點藥店。上半年，連鎖藥店收益增長百分之九，達二億二千萬元，線上藥店收益升四倍多至近一千九百萬元。