呢個世界，點會有咁多懷才不遇吖？只要啱timing，舞台一定會屬於你！好似導演彭浩翔、鄒凱光（灘叔）同攝影師出身嘅劉翁，除咗擁有自己嘅箇有舞台，三位喺十月會合作搞棟篤笑，仲取名《翔揸劉灘之潮潮的吹》，一聽就知有排吹。

今次「Paco巨星飯堂」，我就邀請三位去到位於觀塘嘅「La Serre」，品嘗特色嘅西菜，細說開Show背後嘅故事。

劉翁、阿彭同灘叔（左至右）合作搞棟篤笑，未開show就大講黃色笑話，連影相都唔正經，相信真正開show時，佢哋必定「變本加厲」。

我帶三位去到位於觀塘嘅「La Serre」，品嘗特色嘅西菜，細說開Show背後嘅故事。

熱愛打邊爐嘅劉翁，話鍾意烚住傾，一大班朋友即使未齊人都可以食住等。

阿彭喜歡Risotto（意大利燉飯）介乎軟硬嘅質感，仲話：「我命太硬，食番啲淋嘢戥番勻。」

灘叔就話，同女士撐枱腳就最啱食日本菜，無論食物定氣氛，都較易令人留下好印象。

「金盆」推手

今次真係好難得，集三位「含水量」甚高嘅嘉賓於一堂，相信大家同我一樣，想了解佢哋點樣開始有呢個概念。

阿彭話：「其實想做好耐o架嘞，以前細個睇黃子華嗰啲棟篤笑，一路都覺得自己應該做，但嗰時唔敢做。直到識到佢兩個之後，佢哋一路鼓勵我，話：『咁你不如做啦！』，同埋我一諗到，如果同佢哋兩位做，萬一唔好笑都可以賴佢哋，一諗完呢樣嘢之後，我就舒服晒。」

灘叔表示：「好少見彭導咁謙虛o架！我知道佢好想做（棟篤笑）好耐o架嘞，咁我自己做過嘅，我覺得佢好啱做，但佢就差個動力，咁我咪話不如我哋一齊做囉，你咪減輕啲囉（壓力），但佢就話：『減輕啲都要做o架啦！』，跟住我就話：『你再諗吓喎，黃子華唔做嘞喎，你仲唔做？』，呢吓反而令到佢覺得係時候要囉。」

一俾灘叔爆料，阿彭即刻激情澎湃：「真係撻着咗團火！佢（鄒凱光）話俾我聽，話有一次同黃子華無端端提過話阿彭想做棟篤笑，佢（黃子華）就即刻話唔做嘞！」

灘叔補充話：「我同子華講，聽講阿彭話想做，咁佢（黃子華）就話：『我以後都唔做嘞！』」

阿彭繼續吹：「同埋原本佢兩個一開始同我講，一齊夾份搞間公司話要上市嘅，跟住我話好呀！上市都好呀，點知後尾就話，上市之前不如搞咗個talk show先啦！」

劉翁接力：「點都要做啲嘢嘅，唔係你點招股啫？」

阿彭順勢而上：「今日就搞talk show，聽日就CEO啦！或者IEO都得。」

未開show已經不斷吹水，相比之下，劉翁就正經咁講：「我好簡單啫，我就成日同阿彭導游水，期間瞓咗喺池邊，我哋都講咗幾多嘢。有一日就諗，會唔會有一日可以將個啲嘢呈現喺個台上面呢？跟住加埋有灘叔嘅帶領，咁就成事嘞！」

一睇poster，就明白佢哋走型格路線啦！

劉翁（右）表示，同拍檔喺記招以乾濕褸look示人，係為咗呼籲粉絲，想睇佢哋「打開晒」就要買飛入場，相當有心思。

三Show合一

講到開show形式，阿彭話：「我哋今次每個人都係獨立做半個鐘，所以我哋係完全唔夾嘅。佢哋都有話使唔使溝通吓先，咁我就話完全唔好，因為我覺得我一講出嚟，佢哋會抄我條橋！」

灘叔即反駁：「大家咁話啦！你都知我有好多秘密武器o架嘛，手榴彈呀嗰啲喺晒後面！」

大家身為娛樂圈嘅一份子，係要娛樂大家，所以我有信心，呢個騷一定令大家好開心。

劉翁贊同我嘅講法，「同埋好抵呀！一張飛睇三個show。」

灘叔話：「Paco話你哋點計數o架，搞show唔係咁搞嘅，一張飛係睇一個show，唔係會好蝕o架。」

阿彭就有唔同睇法：「呢個係上市嘅第一步，講持久力我就唔夠子華強，佢可以去到兩個幾鐘吖嘛，我哋一般只維持到半個鐘咋，包埋着衫、睇報紙、修髮尾同埋剃鬚根嗰啲。三個show，每個半個鐘，差唔多o架嘞！」

三位一人一part，主題各有不同，灘叔表示：「我就唔知佢兩個嘅風格，我自己就會講好多兩性嘅嘢，因為我唯一熟嘅係女人，但我對女人好差，基本上我希望令女人知道，壞男人係點樣，等佢哋可以早啲防範，日後遇到都可以放心少少嘛。」

劉翁話：「咁係《警訊》嚟o架喎！我就教大家點樣做一個成功嘅壞男人，做壞男人未必係壞事嚟嘅，但當你知道壞男人應該點做嘅時候，身邊嘅人就會防你。」

阿彭再次唔正經：「灘叔講兩性，我就主要講佢兩個，我諗個show會好長。」

炒法式田螺配薯蓉、韭菜、乾葱、味噌汁（$88），非常惹味。

卡邦尼意大利飯配火腿、芝士、蛋黃（$168），入口感覺甚rich。

菠菜芝士意大利雲吞配番茄汁（$138），帶酸嘅番茄汁，夠晒開胃。

香煎鱈魚柳配蜆肉、番茄（$228），蜆肉更能襯托出鱈魚柳嘅鮮味。

慢煮羊柳配青豆、火腿及紅香蒜（$258），經慢煮嘅羊柳更見嫩滑。

紅桑梅蓉配雜莓、雪糕（$78），集甜酸、冷熱於一身。

西班牙肉桂條配朱古力醬（$68），滿足晒愛好甜點嘅食客。

特備環節

三位喺圈中以好人緣著稱，咁今次有冇號召啲好友撐場？阿彭話：「都好多好友嚟問我哋嘅，但我哋真係飛太少嘞，只做兩場，我都希望留番啲飛俾普羅大眾，因為我想聽多啲觀眾嘅意見。」

劉翁大表贊同：「我哋啲朋友個個都搞事，請佢哋咪即係柴台。」

阿彭翻兜：「係呀！你請葛民輝，佢真係會自己走上台，原本唔使請保安，佢哋出嚟就要請保安嘞，可能又會喺看台度嗌，我講一句佢又答一句，變相大家一齊講。」

哈哈哈！咁樣台上台下講成一片，氣氛咪仲正，但原來佢哋仲有預備特別環節。劉翁話：「呢個神秘環節，我相信係人見到都會濕嘅。」

阿彭「質疑」：「唔係話呢單嘢取消咗咩？」

灘叔就煽風點火：「呢個係台灣最新興嘅玩意嚟o架！」

阿彭就解說：「叫『幻想的愛』，即係自己一個人喺台上、自己一個人表現嘅一場性愛，但係冇對手嘅，簡稱『X空氣』。」

三位諗頭多多，我相信唔到入場一刻都唔會了解佢哋嘅真正表演，先預祝佢哋Good Show！

阿彭（左二）同劉翁（左一）經常結伴活動，除咗游水，連行山佢哋都係buddy。

La Serre 地址：觀塘海濱道90號地下1號舖 電話：31684471