鄭則仕對住公仔入戲

出名好戲之人嘅鄭則仕（Kent哥），呢期又返無綫，幫手拍一部時裝劇《反轉貴利王》，故仔講佢原本係個食人唔（口累）骨嘅貴利佬，後來性情大變，變番做好人。

早前，東姑喺深水埗見到Kent哥喺度拍外景，同場仲有一樣好戲嘅「綠葉王」韋家雄。場戲係講佢哋企喺街上面，見到有人想跳樓，於是乎就企喺度睇；不過，就要表現肉緊，戥跳樓嘅人擔心，所以表情多多。

為求逼真，劇組好認真咁做咗個假人道具，做呢場跳樓戲，而Kent哥同韋家雄就差唔多全程對住個假人做戲。現場所見，佢哋睇住個假人跳樓，睇到咬牙切齒，好似真嘅一樣，真係好演技。不過，六十七歲嘅Kent哥年紀有番咁上下，睇嚟就唔係幾頂得順酷熱嘅天氣，又要企得耐喇。東姑見佢趁空檔時，就喺附近士多買咗支水，工作人員又擔埋張膠櫈畀佢坐路邊休息，都好體諒Kent哥嘅！

 

Kent哥同韋家雄差唔多全程都係望住個假人公仔做戲，但表情真係做到似層層，好似真係睇住人跳樓，一樣咁肉緊，認真好戲！

劇組出動到吊雞車，將個假人公仔從高空拋落地，拍攝呢幕跳樓鏡頭。

 

瞓喺地上嘅呢幕，有真嘅特約演員去演出，韋家雄仲似係識英雄重英雄，尊重對方專業瞓街演出，拍完即扶番起對方。