鄭則仕好戲之人1秒變面

鄭則仕（Kent哥）係出名嘅好戲之人，最近佢返無綫開工拍劇，拍攝梁材遠監製嘅新劇《反轉貴利王》（暫名），觀眾又有機會睇到佢嘅精彩演出。

日前，東姑就喺薄扶林村遇到Kent哥。當日，佢同許家傑（送水輝）及一眾演員，喺後巷拍外景。劇入面飾演「貴利王」嘅Kent哥，似拖行馬去講數、收數，個樣殺氣騰騰，好有「大佬」嘅霸氣。點知，轉頭一嗌cut機，Kent秒速變面，變番真實嘅佢，成副面口慈祥晒，仲十分之和藹可親。佢同其他演員認真睇返playback之餘，拍攝空檔又會跟班後輩有傾有講。相信佢呢個老前輩，趁機袋咗唔少好嘢，落班後生嘅袋，傳授唔少佢做人、做戲嘅經驗。

東姑現場所見，大家圍埋傾偈期間，Kent哥表情百變，一時裝腔作勢似鬧人，一時「烚熟狗頭」笑口噬噬，佢瞬間七情上面，似正在示範爐火純青嘅演技，睇到東姑都拍案叫絕呀！

劇中飾演「貴利王」嘅Kent哥，一臉殺氣騰騰，帶領住一班手下，似係去講數、收數。

演戲從來都咁專業同認真嘅Kent哥，同其他演員一齊埋「芒」睇番playback。

一時兇神惡煞、一時「烚熟狗頭」，Kent哥似係示範一秒即變面嘅演技，認真頂瓜瓜！

現實中，平易近人、和藹可親嘅Kent哥，同班後輩嘅有傾有講，相處愉快。

劇中，吳業坤演Kent哥嘅契仔，而Kent哥將會由大奸大惡，到後來性情大變，變番好人。