主頁 > 名人薈 > 名人專訪 > 茶味人生　羅筱微 2018 年 06 月 12 日

茶味人生　羅筱微

香港人日忙夜忙，不斷為生活搏殺，希望換來一份高薪厚職，過無憂生活。

但前資生堂香港有限公司總經理羅筱微（May），卻甘願裸辭放棄筍工，一六年離開資生堂後，將腳步放慢，專心鑽研茶道，去年更入股「茶老七」，體驗慢活之道，細味人生。

「以前做嘢，乜都衝咗先，日日開會，真係好攰。自從接觸咗茶道之後，識得靜落嚟坐一坐，俾個腦放空，將生活節奏調慢，成個人有種被釋放嘅感覺，好舒服，係我做咗咁多年人嚟，從未試過嘅享受！」

懂得慢活，才能走得更遠！

羅筱微學習茶道三年，坦言專注力最重要：「學茶唔可以分心，亦唔可以急，我以前好多雜念，試過一路泡茶，一路玩電話，點知就燙到手。」

廿年勞碌

從小已是學霸的羅筱微，中學到加拿大升學，二十歲已於University of Guelph修畢市場營銷系。做過廣告公司的她，九五年加入資生堂後，即被公司重用，二十一年來分別擔任過髮型及自助架部門主管，又開發過「Za」化妝品牌，同時亦身兼高級市場經理，掌管員工超過三百人，女強人形象鮮明。「我高峰時期一個人頂三個post，每日不停咁開會，有時要工作到九、十點先放工。一到周末我就搏命約人去玩，以為咁樣就係relax，但我啲同事成日笑我，星期一返工個樣，仲殘過星期五放工嗰時。」

事業如日方中的她，○九年曾被公司派到俄羅斯出差三個月，但因文化差異，而感到莫大的壓力。「喺俄羅斯生活真係好苦悶，好多時都唔可以出街，因為當地治安好差，天氣又凍，食物又唔o岩口味，逼到我要成日食公仔麵同麥當勞，三個月足足肥咗十磅。而且工作要面對好多挑戰，突然空降一個香港人嚟管佢哋，初初啲俄羅斯人好唔配合我，個個都好自我，我花咗好多時間去融入，好大壓力。」

去年羅筱微成為第一個考獲茶館等級評審員資格的香港人。「呢張證書唔係你想考就考，要喺深圳通過interview，先俾你去讀個course。」

羅筱微拜師黃柏梓學茶，「我間中都會去潮州鳳凰山拜訪黃老師，佢會講好多茶道嘅歷史故事我知，好有趣。」

學習茶道

羅筱微為了事業永不停步，但卻發現身體慢慢響起警號，令她不得不停下來。「做sales永遠無話做得夠唔夠數，條數永遠都要更好，有種無窮無盡嘅追求。我覺得身體好攰，好想停落嚟休息，開始去學茶道，希望俾身體同個腦靜落嚟。考慮咗一年之後，把心一橫裸辭，俾自己徹底沉澱一下。」

離開奮鬥了二十一年的公司，對羅筱微來說，確實不易。原來她早在三年前，已想拋下煩囂生活，到深圳學習茶道，重整身心。

「我喺資生堂工作時，每次帶傳媒去日本，都會安排佢哋去學茶道。我好鍾意日本嘅茶道精神，非常需要專注力，係我想要嘅生活態度，但我知道中國飲茶嘅文化係最深厚，於是就去咗深圳學品茶，仲有好多歷史故事聽，一學就愛上。」

羅筱微笑言，自己不是從小就喜歡飲茶，甚至連水都不多飲。「由細到大我都唔鍾意飲滾水，因為對我嚟講，滾水同通心粉都係有病嘅時候先會飲同食。出來工作後，特別鍾意飲奶茶，如果早上無飲，我會覺得頭痛、開唔到聲。直到近呢幾年，發覺自己一飲奶茶，就會反胃同嘔，先知原來每樣嘢都有限額，飲奶茶原來對身體好傷。」

早前她專程到潮州，與茶農上山採春茶，由採茶、曬青、涼青、浪青、殺青、揉青、散索到烘焙，她都跟到足，每個步驟都是學問。

羅筱微（右一）在資生堂工作超過二十年，每次有大型活動，她都親自監督，早年曾與李嘉欣（右二）等為資生堂ifc專門店主持開幕禮。

細味慢活

去年於機緣巧合之下，羅筱微與拍檔談起品茶，從此改變了她的事業軌道。「佢係潮州人，日日都有飲茶嘅習慣，每次同佢品茶，都會一邊點香，一邊聽住音樂，成個人好放鬆，毫無雜念，享受泡茶嘅樂趣。咁o岩嗰時深圳間『茶老七』老闆決定唔做，我哋就買咗間茶店嚟做。」

二人更買下潮州鳳凰山一個山頭，與茶農一起採春茶，每星期都來回內地三天，由採茶、設計到包裝，均由她一手包辦。

「我o依家先明白咩叫做粒粒皆辛苦，每片茶葉都得來不易，要落好多工夫。以前我只需要坐喺公司，咩都有一team同事幫你，o依家我要down to earth，咩都要親自去傾去處理，對我嚟講樣樣都唔容易，要一路做，一路學，但我好享受個過程。自從接觸到茶之後，我理解到咩叫做慢活，唔係要你slow motion，而係可以有時間，坐喺茶室，靜靜過一個下午，專注去做一樣嘢，就係我嘅慢活之道！」

琴、棋、書、畫、花、酒、茶，除了是文人的生活雅興，今天早已變成慢活的潮流玩意了。